BAKIT KAYA?
Nung ninu pa ring mangayap
Ilang maranun mumuli king santungan da ring magpiak
Ban e nala magmulagat
Ing bakal da mung kinuldas
King saug ning kapaynauan, galus ning malugmang palad
At ing gapus ning pasakit a kabang bie e mekalag.
O’t makanian?
King gulut da ring pangadi
A linubid aldo’t bengi ban mapupus ing lunggati
E ra kimtan man saguli
E ginulis karing labi
Ing timan da ring timaua king ligalig a mag-ari
Angga king tauling inaua ing dusa yamu ing saksi.
Nanung sangkan?
Kapilan man e atabmuan
Ing pamipante-pante at ing paintunang katimauan
Kinulio at mekilaban
King libutad da ring dalan
Migmartsa la para karing mikutkut king kakaluluan
Ban balas ing sagana ring alang kaladuang kasalang.
O bakit pin?
Ding makualta’t mayupaya
Ila namung magpadurut king gubyernung mamiraya
Ila kabud ding matula
Karing mamagus a pala
Samantalang ding maluka agiang mipauas lang daya
Angga king tauli rang singap e la bitasang minaua.
Yan ing sangkan?
Ania dakal e patugut
King busal ding gugulisak makiyabe la’t sasamut
Arapan ing makatakut
Maski ing pake paniambut
Uli ning misna ya kalyap mumuli ya king bangungut
Nung ding alang lagiung balas king katauan da la kutkut.
Atin kaya?
Galal a makapanaya
King banua o nukarin man ing labuad a puntalan da
Nung ing yatu migmaimut ya
At ing tula pigkait na
Sana ketang banda karin ating sayang manaya pa
Karing sinuba king agus ning bie e patas karela.
At kapilan?
Itang daya rang misaluak
Para king pekilaban at karing prinsipyung bilalag
Mirakayan na king basbas
Ning justisiang matalusad
Ban ing kabilian ding dakal a kalulung mangisalbat
Mirinan nang kapupusan at mangabiayan nong mayap!
02 Pebrero 2014
