Misisiglu lang king tuyu kinandut
ding limang anak a pakalto galudgud
gagad la uli ning manyagid a danup
ban milamnan agad, ding maplas dang dungus
kabang mamangan la ala lang patugut
tatampa at agnan agnan pang gagamus
neng ing tuknangan da ken yang gilid ilug
a pamugaran da ring dakal a yamuk
2.
Kabang mamangan la aplit la pang mayli
neng mikalaman la ring atyan da reti
penandit kanita ing pangane dili
tipa ya abe ne ing metung nang wali
at ding mikapatad a adwang lalaki
tulak de’ing karitun ban lang dumiskarti
king pamangalakal bakal ampon boti
ban atin lang kanan karas na ning bengi
3.
Ustung damdaman de’ing karitung masigla
a pitulak-tulak ding koya rang l adwa
ding melakwan bale agad nong sagana
makatiman la ngan ampon maligaga
king isip da reting masyadu pang mura
makuswelu na la makapangan la sa
agyang e ra balu nung ating biyaya
a pisusulwan da potang panga bagya
4.
Nung malak-malak la mata at pipiling
ding adwa rang koya balu ra nang tambing
uling masala pa king kislap ding batwin
ala lang asubu baski kabunitil
at pilitan da mang matudtud maimbing
king kaplas dang dungus pilmi lang migising
ketang pagkeran da ta la biling-biling
mangisnawang saldak, kikyak, sasaingsing
5.
Yan ing karaniwang akakit tang tagpû
karing ulila na king ibpa ra’t indû
Retang anting anghel a ala pang balû
king durut ning yatu nu la painturû
itang katawan dang mura pa at lunû
king pamanintunan misabak nong tutû
dapot makanian man den e la susukû
lalaban parehas at magpakatutû
6.
Samantalang detang dapat a lumingap
karing kalupa ra reting sawing-palad
o retang melipang melasun na utak
a misasamsaman king grasyang katambak
ala lang pakialam at magpaka-bundat
king kaban ning baleng gisan dang alimas
makananu ne ing bansang Pilipinas
karing manungkulang kampun nang Satanas
