Misisiglulu lang king tuyu kinandut
ding limang anak a pakalto galudgud;
Gagad la uli ning masagad a danup
ban milamnan agad atyan mangalukguk;
Kabang mamangan la ala lang patugut
king tampi at alang patanat mangamus,
Neng ing tuknangan da ken yang gilid ilug
a pamugaran da ring dakal a yamuk.
Masaya lang lubus at aplit pang mayli
niang mikalaman la ding atyan da reti;
Penandit kanita, ing pangane dili
tipa ya abe ne ing metung nang wali;
At ding mikapatad a adwang lalaki
tulak de’ing karitun ba’lang dumiskarti
king pamangalakal bakal ampon boti
para pamangan da karas na ning bengi.
Ustung damdaman de’ ing karitung masigla
a pitulak-tulak ding lalaking adwa,
Ding melakwan bale agad dang sagana
at palundag-lundag king sobra rang tula;
King isip da reting masyadu pang mura,
masaya no’ basta makapangan la sa;
Agyang e ra balu nung atin pin kaya
a pisulu-suluan da reti potang bagya.
Nung malak-malak la mata at pipiling
ding adwa rang koya balu ra nang tambing
Uling masala pa king kislap ding batwin
ala lang asubu agyang kabinutil;
At pilitan da mang matudtud mahimbing
king kaplas da dungus pilmi lang migising;
Ketang pagkeran da ta’la biling-biling
mangisnawang saldak, kikiak, sasaingsing.
Yan ing karaniwan bie da ring kalulu
a ulilang lubus king karelang Indu,
Detang mala-anghel a ala pang balu
king durut ning yatu nu’ la painturu
itang katawan dang mura pa at lunu
King pamanintunan misabak nong’ tutu;
Dapot makanian man den e la susuku,
Lalaban parehas at magpakatutu.
Samantalang detang dapat a lumingap
karing kalupa rang king bie sawimpalad
O retang melipang melasun na utak
at misasamsaman king grasyang katambak;
Ala lang pakialam at magpakabundat
king kaban ning balen a gisan dang alimas;
Makananu ne ing Indung Pilipinas
karing anti reting kampun nang Satanas?
Vhelle V. Garcia
United Arab Emirates
August 30, 2013
