(King bie ning metung a politiku)
KANITANG ATIN kung dakal a kabiayan
At kabilang karing asias ning lipunan,
Kanita, dakal la, kalulu’t atinan
Ding kapanalig ku at kakaluguran.
Ikit ku, nu’ku mang balen mipapasyal
Misusumangid ing aniaya ring dakal,
At agiang nanu mung okasyun ing datang
Madalas, aku ing bisitang pandangal.
Pasbul ning bale ku biklat keng manawa,
Karing kenu pa man a kaku magsarya;
Malaya lang lungub angga king kusina,
King nanu mang oras mangan ya ing bisa.
Alang e midinan o kaku mekakua
King kaku’y nawad da lalam kung upaya;
At pati ring e ku sadiang kapamingwa,
Pekiabayan ku lang anti ring aliwa.
Kanita ing balang katayang sabian ku,
Pakirandaman dang anting igkas Ginu;
Malati’t maragul kanaku mamintu
Alang e metupad king balang buri ku.
Dapot uling ing bie mengari mung dugang,
Ngana nang mibabo, ngana nang milalam –
Kanita, atinan… ngeni rugu, oyan…
Ing anggang tipun ku melaso, mesintang.
Ing lalung makirut a kanakung kimtan,
Mebating kung bandi pati kaluguran;
Ngening lupad na ku’t ala nang sikanan,
Ing mitagan kaku – Asu niang pulgasan!
Ding kakaluguran
(Agpang king metung a propetaryu)
KANITANG king bangan dakal ku pa tipun
At ing pagkera ku malambut yang kutsun,
Kanita dakal la… malati’t maragul
Ding kakaluguran a kaku mandatun;
Ala kung liliwan kilub patingapun
Ing balang buri ku balu rang idaun;
Kareti, nu’ku man magdulap, manintun
Makakit kung agad, e ku man man lumuyun.
Kilub ning aldo-aldo gewa na ning Ginu,
Maka-paiki la king balang kimut ku;
Abe ko’ng magsaya potang maglimbang ku,
Pati karing kualtang laman ding bulsa ku;
Ala ninu pa man karing meniad kaku
Ing e midinan ken lalam ning agyu ku;
Kalulu’t atinan, lawe ku parehu
Uling pante-pante ing pamakiabe ku.
Dapot uling ing bie mengari mung rueda,
Ngana nang mibabo at milalam keta,
Kanita makualta… ngeni pulubi na,
Paldas na ing benging sadia kung ligaya;
Ing lalung makirut a kakung pibata,
Pati kamag-anak ku ala nang minta;
Uling ala na kung gaukan karing bulsa,
A malyaring yabut ku neng daratang la.
A, ngeni ku ikit, abitasang lubus,
Ding keraklan ala lang keliwan kabud
King kakung anino madalas katanud
At takatakiki king kakung pangimut;
Marap kung king sala… atiyu king gulut,
Gulutan ke iti… king arap ya lalsut;
At king madalumdum nung karin ku lungub,
Ditman e ke akit nu’ku man dumurut!
