1.
Iniang misara ya ing tete Tulauc
dakal migkasakit karening mag-commute
anak a magaral meragul la gastus
pati magobra king karelang pamaglub
espesyal a byahi siyentu beinti pesus
kwarenta pesus ing singil balang buntuk
2.
E naman magsilbing singilan naka mu
kwarenta pesus ning mamasada rugu
dapat ing tricycle manyake yang atlu
ban e mangalugi king byahing marayu
manibat Tulauc angga king Saluzu
metung a litrung gas mekad e managyu
3.
Medyu mura namang bagya’ing pamasahi
neng Sta. Monica la dadalan deti
uling mamaltang la NORTH GROVE at LA TREVI
e binang marayu ing karelang byahi
sisenta pesus ya nung ika mung dili
nung atlu na ko man munie kong tiya beinti
4.
Dapot mengari yang sampelut ing dalan
king Sta. Monica ngening mamanuran
at ustung ing danum meragul na naman
La Trevi’t, purok dos ala nang midalan
inia siguradu ding magbiyahi kanian
karin king MANABAK ROAD la ngan dumalan
5.
Malwat a panaun na lang mibabata
dening pasaherus at ring mamasada
bulan ning Pebreru inyang misara ya
ing tete a angga ngeni makasara
agpang karing tau iti lumbat ya pa
uling ala la mang akakit magobra
6.
At ing balita pang kanakung akalap
king tutuking banwa e ya pa mibuklat
itang COMPLETION DATE e kanu matupad
uling ken pang FIRST PHASE, pondu e ne sapat
at ining SECOND PHASE ing pekamabayat
ala yang pondu ban ayari reng agad
7.
Nung e mika-meeting ketang munisipyu
ing prublema e ra abalu ring tau
pati amanuan dang phase one ampon phase two
ala lang balu ring manungkulan tamu
nung makanian palang e sapat ing pondu
obat sera da ne, tete kekatamu?
8.
Completion date nanu ing buri nang sabian?
ing takdang panaun para king kayarian
proyektung bisni ra ampon inumpisan
ding miki-kontratang kaniti tatalan
nung ating phase one at phase two rang amanuan
e katanggap-tanggap kekaming SIMONIAN..
9.
Dapat miyabe la king imbestigasyun
ding adwang tete king balen ning San Simun
pota retang pera para king konstruksiyun
megisan no karing dinian dang kumisyun
pablasang talamak ngeni ing kurapsiyun
karing mangurakut perang bilyun-bilyun
