KANITANG i Macky Pangan mabie ya pa,
ing misan sinabi, kaku – ing adua la
klasing pulitiku neng alalan ngana
reng lalto, at deti matsin at tsonggu la.
Nanung pamialiwa ning tsonggu at matsin
parehu lang biasang magsasalambitin?
Ing matsin ngana nyan, akilala me pin
karing lalaklakan nang kutu at sagin.
Ing tsonggu atin yang tagle katakawan
at abalu me keng kayang kabastusan;
Bubutingtingan ne ing ‘iki’ nang Adan
nung kapilan ating makakit king bolang.
Ngana pa kanaku: “Ding matsin at tsonggu,
magaling lang mukyat at magsirku-sirku;
At uling sane la keng paluksu-luksu
lalu lang matinung manaliwa puestu.
Deng matsin ila ring matako upaya,
ing pamanabusu, keng tsonggu menasa;
Nung keng pamanloku at pamagpasasa,
king akbak nang Judas, ala’ng pamialiwa.
Nung buri meng lalung pakibaluan kanu
at abitasa ing matsin kareng tsonggu;
Malubak a pasla, pamanggalamanu,
makasigru kang iti ya ing tsonggu.
At ing matsin naman, mamuksi yang timan,
matigik ya pasla gamat, kaili’t wanan;
At nung ngana: “Ika na sa’ keng alalan
ing bala kanaku” yapin ing matsin yan!
Ngana pa ping Macky: “Amigo yan kwenta
‘figure of speech’ dia ring anti kekata
a nu’ pati na ing batwin asungkit ta’
neng makukumbira katang mangorona.
INIA e ra sukat ipangabaldugan
keng matsura iti ding mitalamsikan
a idolo ra ken detang miyambunan
balang akinnse ya’t mapupus ing bulan.
Uling iting bage a kakung simbitla
makarikil yamu karetang aliwa
a maki-alkas mu at talagang ala
namang imbut nun’e mipuk king upaya.
E kaya migit pa king sadiang tigtigan
ing miral kilub ning karelang tanggapan,
nung nu’ magsueldu la reti balang bulan,
waman katlung dake e ra pegobraan.
Metung a malino tamung yalimbawa
deng kagawad karing barangay, menasa
kilub ning pabanua ya mang makadua
e la makatagun ‘session’ ding aliwa.
Pero ing bukud dang e kalinguan deti
ing aldo sueldu at ‘cash advance’ parati
ding keng ‘online sabong’ sugapa na ngeni
at mikutkut na keng utang bandang tauli.
At nu’pati na pin pekamaulaga
reting botu mekad makapisali na
karing pulitikung makapal a bulsa
at ngeni pamu pin den mamugnus nala.
E kaya uling ning makanian na’ing miusu
ban sumambut ya ing antimo kang Lucio,
a maki-salapang at mingatba sagu,
makapilukluk ta’pang banal a tao?!
