KARING keti ngeni progresibung siyudad,
A maki-kimutan awsan ‘Alay Lakad,’
Ing ken balayan ning San Fernando mekad
Yang pekamatatag a pangatalakad.
Kumpara marahil karing insanu mang
Organisasyun a kalupa na naman
Ing banal a pake ampon kapagnasan,
Mupin e ra’sadsad ing karelang takbang.
Pablasang bukud king asna king kabayat
Igapang at isulung ing ‘Alay Lakad,’
Nung ala kang kasingkilan keng sosyudad,
Agyang kulipak mu ala kang ayawad.
Karing ken a e ra balu nung nanu ya
Parasan ing ‘Alay Lakad,’ antini ya:
Sablang donasyun a akalap dang pera,
Den para gastus la karing iskolars da.
A migit-kumulang king treynta katau
‘Yearly’ ding papagaral da keng kolehiyo,
Inya nanu’t ding anak pakakalulu
Niting siyudad e la maging tituladu?
Nung magpursigi la ren keng pamagdulap
Kabiasnan a mika-malagu lang bukas,
Ngening ing mesabing pundasyun at siyudad
Babie ra ing anggang karen makakayap?
Kapamilatan ding alang kapagalan
A opisyales ning ‘Alay Lakad’ a yan,
Nung nu’ i Ruben Sy, ya ing mamuntukan
At i mayor EdSa sasaup ya naman.
Kagum ding kayabe da reting bibilug
King organisasyun, a nu’ kusa rang lub
Babie ing oras da’t maulagang saup
Ban ing sabla maging mayan at tibubus.
Bilang Fernandinos a kipmuan king sipag
At e patugut ken lalawe kakalap
A maging ‘sponsor’ da ring balang anak,
Ing meging bunga karen mekakayap.
Uling mapalyaring bukas agyang metung
A tau keti ing keng dalan lumuyun
Mayntun apagobran uli na ning pihung
Ala nang bisa keng konstrasksyon maging piyun.
Kase king uli ning ganap malasakit
Ding keng ‘Alay Lakad’ kareti mamitbit,
Ing meging saup den ing karen mipanik
King matas-atas a bili rang asungkit.
Nung nu’ oren, umpisa pangatatag nyan
Ding apayari ra – migit, e kumulang
Ati’no mekad king manga walung dalan
A kabilangan den ngening salukuyan.
At mapilan namung panahun marahil
Ala na metung mu mang Fernandino ping
Bait king kalukan, nung buryan na murin
Ing makapagaral at ing bie sumanting.
Uli ning bukud king ibabie rang saup
Ding keng ‘Alay Lakad’ ken alang patugut
Manintun ‘sponsors’at mamagpalimus,
Karing bulsa niti, atin lang agauk.
Puera pa ing babie nang saup ning siyudad,
A nung nu’ magkanu lang kualtang akalap
Ning ‘foundation,’ deti dirian no’ng kaumbas
A’yalaga ning Mayor nanu mang oras!
