LUNGSOD NG BALANGA — Umabot na sa 3,364 ang bilang ng mga nagpositibo sa coronavirus disease sa Bataan matapos magtala ng 25 bagong kumpirmadong kaso at umakyat naman sa 3,032 ang mga nakarekober nang magkaroon ng anim na bagong gumaling, batay sa ulat ng provincial health office Huwebes ng gabi.
Sinabi ni Gov. Albert Garcia ngayong Biyernes na dahil mas maraming bagong kumpirmadong kaso kaysa gumaling, tumaas sa 263 ang mga aktibong kaso. Ang mga nasawi ay 69 na.
Ang mga bagong kaso ay 10 mula sa Abucay, anim sa Mariveles, apat sa Orion, dalawa sa Pilar at tig-isa sa Balanga City, Orani, at Dinalupihan.
Kabilang sa bagong nagpositibo ang apat na bata – isang 2 taon, dalawang parehong 3 taon at isang 12 taon.
Ang mga bagong gumaling ay apat mula sa Orani at dalawa sa Balanga City na ang pinakamatanda ay 70 taon at ang pinakabata ay 13 taon.
Mula sa 36,724 na na–test sa virus, 33,139 na ang nagnegatibo at 221 ang naghihintay pa ng resulta.
