BITE

1.
King miyayaliwang clasi na ning crimen
a mangapalyari king kecatang balen
migaganaca no, ring sablang memalen
lalu ring pamuntuc, na ning PEACE AND ORDER
caring manarampas, at RIDING-IN-TANDEM
a manasic lagim caring sibabalen

2.
kilub ning aldo’ldo a laman ning dyaryu’
at balita caring TV ampon radyu’
nung e pamanoldap caring malda”t bangcu
atin lang pamaten caring puliticu
milalu nang bina crimen kecatamu
a babie ligalig caring sablang tau

3.
At pauli na ning macanian a dapat
ding tau a sugu na waring satanas
mica-municalang, dapat neng patupad
ing parusang bite, lalam na ning batas
ban canita canu malagwang mapatpat
ing macarimarim a criminalidad

4.
Oneng ing pisamban at cayang galame
sasalangsangan da ing parusang bite
uling agpang caren ing kecatamung bie
peparam na ning Dios, kecatang mabibie
ala cong upaya, ngarang patluran ye
nun e mu ing Guinu potang kuanan na ne

5.
Dapot icatula na caya ning Guinu’?
ing maroc a dapat ding aliwang tau’
ila wari retang kampun na ning diablu’
a kayang kinalat keti babo yatu’
dapat pin pisamban ya ing munang mactu’
laban king masangil, at gawang e ustu’

6.
mipapa-isip cu nung ing parusang yan
magi yang sulusyun king caligaligan
pablasang dacal nang maki-sapalaran
a alang panganlap canyang camatayan
at ing peca-yamut ning sablang dewacan
casakitan king bie tamung daralanan

7.
Ninu mo ring taung mengarap matsura’ ?
taluntun king dalang icapayamac da
acacua da rugu, reting mililisya’
ustung maplas no ring carelang bituca’
e ra paimburis, ing mangamate la’
king danup a maca-mulagat a mata’

8.
Nung alang daranup, alang manarampas
ala sanang droga a binang talamac
inia meracal lang caniti tutulac
malagwa ing pera , obrang e mabayat
potang ding gagamit , melipang no utac
canita no gawang bage e masampat

9.
Palage yu caya nung ipairal de
king kecatang bangsa ing parusang bite
den cayang manaco at alang marine
caring puliticu abe lang mabite?
maya’pa sigurung ibasura da ne
ining municala nung e ro pakiabe

10.
Uling nung king balen alang mangurangut
careting memalen ala sa’ng daranup
imbis saupan da la king ba lang micabus
ketang cacaluluan ila pang magpalbug
ala sanang crimeng makapangilabut
nung caring pusu ra mangibabo’ing lugud

11.
Parusang bite pin caya ing pakibat
ban asugpu tamu ing criminalidad
uling canita pang panaung milabas
pepairal da ne keti Pilipinas
at nung pasibayu re mang ipatupad
ding pacacalulu ring mangabalasbas

12.
kabang e maputut ing capanacawan
da ring mangataco caring manungculan
ing miyayaliwang aske ning carocan
ya’ing ganap mag-ari, caniting balayan
sakaling ing bite, mipatupad ya man
ding menaco lider, dapat lang unaan….