(Iting poesia malugud keng yampang karing anak a matagumpe migyari keng pamagaral da, a migsikap ustu banting akamtan deti ing malagu rang paninap; at e anti ing kerasan niting estudyanteng paksang diwa ning malukang panyulat ning kekayung talasuyu, a minyayang mung oras at salaping pipawasan ding keyang pengari, inyasa’t ing keta akamtan na bandang tauli…)
NUNG semasan ku sa’
Ing kakung sarili, at e migpabaya
King pamagaral ku
Kanitang ing bili magkolehiyo na sa,’
Mekad nung e ku man
Inhinyero ngeni a kapad dang bina
Ding kakung pengari,
A’yala na yatang kabas king ganaka,
Mekad metung na ku
Karing peka-tanyag a Talapamingwa
Ding pakakalulu,
Laban king mabanding mapanalipusta;
O nung ali kaya,
Pihung medisina ing kakung ayari,
A metung mu naman
Karing propesyun a parehu rang buri;
At uling karela
Mas matimbang kesa keng krus ning salapi
Ing karing salunan
Makapanulu ku king maskup dang bili,
Makusuelu na la,
At alang nanu mang panayan a sukli;
Makanian kasampat
Ing kaku pignasan dang maging taguri!
Sayang…mipabusten,
Lesak ning kelan kung malasakit ganap,
King tagimpan deti
A maging metung kung mapuri rang anak;
Uling nung e ku sa’
Meging suwail at miniayang mung oras
King kelan masabal
Ampon interes king karelang paninap,
At keta nung kenu
Mekipag-barkada’t kinawe king alak,
Alang sangkan e ku
King Campus ning U.P. makalmang dinalpak;
Nung nu’ ing talindo
Ding kakung pengari metupad sana ngan,
At mekilala ku
Lagyu king taguri a kalang-alangnan;
A e na kalupa
Ning kaku yaus da ngeni ring keraklan:
“Oyan i Kalasing,
Makasingku litrus ne namang pihu yan,
Anya sunde-sape
Ne namang maglakad libutad ning dalan;”
Makanian kasalpak,
Ing bunga ning bigung paninap nang Inang.
Inia kekayu ngan
A salukuyan pang magaral, magdulap
Mipuk king pagnasan
Dasan at akamtan king aldo ning bukas,
Iting depatan kung
Imbes magaral ku meniayang kung oras,
Inya bandang tauli,
Ing kemaulian ning e ku pamagsikap
King binie ra kaku,
Para king sariling kakung ikakayap,
Nanu ing disan ku?
Lubas yang anino at bigung paninap!
