1.
Ustung bayu ya ing banwa nukarin man keti yatu’
paninasan ding aliwa mika ating pamagbayu’
king karelang pamibie-bie panugali at istilu’
a nasa rang i reporma karing dapat dang e ustu’
ding mapilan darayu ra itang mangatsurang bisyu’
anti ing pamagbabai, alak, sugal, sigarilyu’
2.
Uling king panaun ngeni dakal no ring magkasakit
inia naman ding aliwa belakan da ing magtipid
at ing metung a paralan a karelang aiisip
itang magastus a bisyu idayu ra na pang pilit
king ban medyu minawa la’t e na binang malilipit
subuknan de ing kasebyang king sinturun pa manigik
3.
Dapot nanu mang gawan da ketang simpli rang tagimpan
waring iti e pakibat king karelang kasakitan
pablasang e makayakma king karelang panakitan
ing gastus king aldo-aldo ra reting pamangabyayan
ken mung abias nung lima la retang anak mung pakanan
ing suweldu mung misan aldo maybug- aybug neng magisan
4.
Nung mitagung ing bunsu mu sususu ya rugung gatas
uli ning mal ban matipid salatanan mu pang ditac
ketang “AM” a marayuput king ban akua nang maglambat
ing metung a latang BEARBRAND king paruminggung mayatyat
at keraklan pa ing ulam iko ring kekayung anak
nun e ebun ampon tuyu metung a latang sardinas
5.
makananu mo pa kayang papagaral ding anak mu’?
nung ika metung ka rugung karaniwan a ubreru’
agyang karen pang iskuelang sasabian dang pampubliku’
pilming ating babayaran migastus ka mu ring pihu’
at ing metung pang masulit a pabayat kekatamu’
ining alang kwentang K12 a tikda na ning gubyernu’
6.
Ban masensu ya ing tau iti atyu namu kaya’
ding keraklan king aliwang bansa reti darayu la’
deta namang e mikalma a keti mu mamagobra’
nanung klasing pamibie-bie ing kareti manenaya?
ing pag-asang paninasan king katutuan marayu ya
kabang king gubyernu tamu mabuluk pa ing sistema
