KENI king San Simon a nu’ kabalitan
ing ngeni lima la bali ring tatagal
bilang mayor, at nu i Mayor Punsalan,
bista’t “on force leave” ya timawa yang tagal.
At waman ing tutu keng bili na niti
atin ya pang migit limang bulan iti
king ‘seat of office’ na antimong alkalde,
magkang ken ala neng balikan i J.P.
Uli ning bukud king kwenta walung bulan
ing ‘suspension’ na pin ken king Sangguniang
Panglalawigan ning Pampanga, atin yang
Aparting kasu i mayor keng Ombudsman.
Inya keng biling yan, kwenta ala suerte
na mu marahil king kekatang alkalde
(Abundio Punsalan) ing miyabe ya’yti
karing mipukpukan keng Mayo a nuebe.
Keng ‘survey’ lamang yang maragul i Jojo
kumpara kari Wong, Bong Garcia at Keko;
At waman ngara ken kakadua yata pu
kang JVG, pero atin ya kanabu.
King patung-tunggal a mababawas la
ding metabang a lub, ing yang bitbitan da,
pasari ning buknul a kakalagan na,
king kelan ingat keng opisyal nang obra.
Nung iti e sana binang memirapal
pepakit ngara pin a’yala keng lugal
at tiwala karing kayabe gugusal,
e ya mitakid king bage a garapal.
INSANU man karing ken tikyan nang mipuk
keng puestu, atimo ring Pineda, Yabut,
Bondoc, Azon Sitchon, pati na i Digos;
King e ustu ala kung balung mitisud.
At agyang ing ngeni a kasalukuyan
O.I.C. o ‘Acting Mayor, idol’ ke yan;
At metung ya karing kakung sasaluduan
antimong metung a tune ‘public servant’.
Mupin king agya mang kwenta kapamilya
ya para kanaku, pero kaku pala
ala yang tiwala – nanung ulaga na
ning sesen ku’ing bage kaplastikan pala?
Lalu pa’t ikit kung karas keng gipitan
ya pala ali ke malyaring asahan;
Normal mu king ating pusu’t kaisipan
a’yanti kanaku ing e manamdaman.
AT ngening i “JOJO” e aliwang tau –
Apu ne bilang ning ‘commander-in-chief’ ku,
aparti – king i Jane ati’ne king kampu
nang JVG, kenu ke sumaup ustu?
‘Non partisan’ kami king laban nang Jojo
a ing susulung na ken serbisyung tutu;
At ya agyang ala yang ‘vice mayor’ pin pu
at konsehal e ya manganib manabu.
Pablasang i “JOJO” malyari neng yabe
ing ninu karing kandidatung Bise
at Konsehal uli ning Independyante
ya pin at ala yang kalaban kareti!
