Kaibat, y Aguinaldo, karin ne bintiwas
King Kawit, Cavite ing mal tang’ Watawat;
Tanda king iti yang aldo nang panaslag
Ning Katimawan king bansa tamung maslag;
Hilario, Maniago at Dayrit – bistama’t
Metung yang babai, mesubuk ya tatag;
At Hizon, kambe ring gereru mung anak,
Upayang Kastila ikua rang asaldak!
Lubus ta’na sanang kumit Katimawan
King tagumpe tamu laban karing daywan,
Dapot ating Dewey a biglang dinatang
Sasyo tang’ Kalayan yang keta sinamsan;
Sekupan ne’ing Balen uli ning sikanan
Ning Agilang ibat king dane Albugan;
At keta ing Bansa miuman deng telanan
Ding e ta’ kalahing maputi mu naman.
Tutu, inampang da itang Demokrasya
Dapot ila muring kekata dirikta;
At waman king Balen linto no’ kanita
Ding anti ri Osias, Quezon at Osmeña,
Roxas, Abad Santos ampon aliwa pa
A sukat talan king sarili tang’ renda,
King pamipalakad king Balen tang’ Sinta,
Atyu kagulutan ing tusong Agila.
Kaibat, uling atin lang apikasundu
King ing sadyang Laya ibie ra nang tutu,
Pauli nang Quezon…ding mesabing Kanu
Tiparan da ren ing karelang pangaku;
Nu’ ing magsarili lubus ta’nang agyu,
Dinan da neng Laya ing Balen tang’ Indu;
Dapot itang aldo inyang sunlag niamu,
Ing Pang-aduang Gyera biglang mikaluku!
Karing pampang tamu bigla na lang linsut
Ding lalu pang lasip ampon makatakut;
At nung ding Kastila a keti sinakup
Kanita linto lang ganid ampon marus,
Deting tauling dintang a keti linusub
Puri’t dangalan mu dekurak dang lubus;
Pilan lang anak mu ding keta metampus
Ban ipaglualu ria ing Balen tang’ Irug?
Salamat, kaibat ning atlung banuang singkad
Ing puersa ding Sakang ikua rang asaldak,
Ding misanib-sanib a puersang milangkap
Ning Agilang meko…at ding kekang anak;
Ing pangakung niting magbalik at sukat,
Ya ing mepalyari king Bansa migligtas;
Itang Yamashita a keti miglagpak,
Mig-‘Hara-Kiri’ ya king keyang panatras!
Kalagpas ning gulu at mipayapa na,
Inampang nang miuman bansang Amerika,
Ing ganap at lubus a Kalayan keka,
Kapamilatan ning beba ne ing Keya
At ing Kekatamu ya’nang pepaitas da,
Layun memayagpag king asul a banua;
Tanda king ing bansang Perla ning Malasya
Kalag ne gapus king panga’yalipan na.
At ngening timawa neng ganap ing bansa,
Itamung anak na, mikalugud ta’sa;
Misanmetung tamu king pusu at diwa
King nanu mang bage keyang kasaplala;
At keta sakali’t atin pang aliwa
King aldo ning bukas miuman pang magnasa,
Pasibayu – itang miagum ban mamingua
King kekatang Balen at mal tang’ Bandila!