(Mamasa ta’ pamung poesiang Kapampangan bilang dake ning kekatang pamangambul king amanung sisuan a e sukat makalinguan at malumpawi karing danggut ta’ng dila)
MISAN, king aplaya, king kakung paninap
Ing Ginu abe keng king pampang maglakad,
A nu’ ku ikit king biltangan ming balas,
Kaparis la kabud ding makalto bakas
A mangabaldugan metung ya’ing tinalas
At ding kaku e ko’ bitasang abakas.
Dapot mekakit kung bakas a’yaliwa,
A e bakas asu, kabayu o pusa;
Deti pabilug la at malapad bagya
At e alkus bitis tau keng kasala
Lalto, uli na ning maragul lang bina,
A’yalang keliwan keng buldit ning banga.
“Ginu,” ngaku “tiktak la pu pangalapad
Ban aku pin pu ing karen makibakas;
Lalu’t pabilug la at sobra kalapad,
E la naman bakas bitis ning damulag.
Asisiguru kung deting linto bakas,
Den e la king nanu mang lelangan ibat”
“Anak,” nganing Ginu, banayad sinabi:
“Wa e la pin keka ding bakas a reti,
Uling kikilikan da ka aldo’t bengi
Ban king baltangan mu king bie, e malili,
Pero wayning keka, bukud kung asabi,
Ika, ing keng dalan kusang pepaylili.
Pauli ning baug a kapanwalan mu
At karing utus ku e mu pamamintu,
Lalu mung mebuya at melubak ustu
Kasalpantayanan a yukul mu kaku,
Inya naman ngening binang tikal na ku,
Belag da na ka ping e mu pilan ukdu”!
E mu pagmulalan nung bakit ding bakas,
Tiktak la karagul ampon pangalapad,
Pasari ning deti – sabyan ku na’ing tapat,
E mo’ bakas bitis king balas tinalas
Nu’ne ren king pilan besis da kang sildak;
Bakas lang buldit a migmarka king balas!
Ing Dirya
BAKET kasaspak mung salu ing tagumpe
Ning para mung taung lalagu pagkabie?
At anti mu waring maybug pakipate
Potang damdaman mung iti pupuryan de?
Baket anti ka mo waring lalasunan
Potang yang paksa ning nanu mang kayapan?
Nanan mu na keta ing ating salangsang
Ban ing kaplas mung lub mirin’ kapaldanan?
Misan, nanan mu na ing mitakid ya sa’
King ba’yang misakab king bie nang payapa,
Uli ning bina mu rugung katutula
Ing akit meng bigu keti king masala.
Ala kang akakit nune ing mali na
A keta agad mung king dalan titinda,
Pero nung kapuryan sa’ ing agawa na
Angga mu pin ketang sasalikut mu pa.
Yan king kapilan man e sukat mamale
King kaisipan ning taung masalese;
Uling mentras makakayap king keang bie,
Mekad mu – king marok karin ne atake!
