Bagong taon, bagong hamon

    84
    0
    SHARE

    Kailan man at tuwing bago maghalalan
    Ay maraming bagay ang kapunapunang
    Mapapansin natin sa kapaligiran,
    Partikular na sa mga ‘public servants’

    Isa riyan ang sila’y biglang bumabait
    At palabati ang dati ay masungit,
    Palibhasa’y nagnanais makabalik
    Bilang opisyal sa isang ‘public office’

    Ang payakap-yakap at pakamay-kamay
    Sa mga botante ay muling iiral;
    Minsan, di man kayo magkakilala n’yan
    Ay sagad taynga kung ikaw ay ngitian.

    Yan ay itong mga kasalukuyan pa
    Na nangakaupo sa tanggapan nila,
    Na kahit di dating masuyo sa masa
    Madali na ngayong lapitan kumbaga.

    At ito namang di mo halos madatnan
    Sa tanggapan nila nitong nakaraan,
    Sumipot na mula nang makapag-file yan
    Ng COC para laging makita yan.

    Alalaon baga, kung pakapansinin
    Natin ang ganitong klase ng gawain
    Nitong ibang halal na opisyal natin,
    Yan ay panggogoyo na lamang marahil

    At di matapat at sinserong serbisyo
    Ang hangarin sa muling paghabol nito,
    Kundi ng para lang sa sarili mismo
    Kung kaya lamang yan kumakandidato

    Sana naman mula sa mga baguhan
    Na nangangako ng pagbabago riyan,
    Palarin na tayong makatagpo man lang
    Ng mga katulad ni Oca at ‘Nanay’

    (Na talaga namang sa husay at galing
    Sa panunungkulan ay maituturing
    Ng leyenda r’yan ng pinakamabuting
    Naging opisyales ng gobyerno natin).

    At di kagaya r’yan ng nakararami
    Na nangangako ng mga pagbubuti,
    Pero pagka-upo – una ang sarili
    Bago ang marapat nilang ipagsilbi

    Para sa bayan at mga mamamayan,
    Na siyang unang dapat nilang paglingkuran;
    Kaya bandang huli… ni katiting walang
    Natupad sa anong ipinangako n’yan

    Hanggang sa sumapit muli ang eleksyon
    At ito’y pamuli na namang hahabol
    At mangangako ng mga pagbabagong
    Kagaya ng kanyang pinangako noon.

    Tayo ba naman ay muling padadala
    Sa ganitong klase nilang pambobola?
    Marahil ang tamang sagot sa kanila,
    Kapag lumapit ay “Tama na, Sobra na!”

    At ang kasagutan naman sa masipag
    Na sadyang subok na’t kilalang matapat
    Ay masuyong ngiti na may halong galak,
    Kasunod ng sabing “panalo kang tiyak”!

    Ilang tulog na lang ay Bagong Taon na
    At limang buwan na lang pihong eleksyon na,
    Kaya ngayon pa lang ay paghandaan na
    Natin kabayan ang nabanggit sa una;

    Kaugnay ng pagdatal ng Bagong Taon,
    (At ng nalalapit po nating eleksyon,)
    Buong kagalakan nating isalubong
    Ang salitang: “Bagong Taon, Bagong Hamon!”

    LEAVE A REPLY

    Please enter your comment!
    Please enter your name here