Sulapu ka ayup
libutad alapap,
malayang ikampe
malapad mung pakpak,
pabusteng labulan
ning anging papaspas,
at king kalambatan
maglakbeng panatag.
kabang e ayabut
sukdulan mung buri,
‘gyang karug sasasal
ali ka bibili,
king gabun midugpa
pag iti maliari,
metung yang pagsubuk
arapan parati.
panabilin ku mu
nung tyu ka king matas,
king saguling saya
e mawiling ganap,
maski nanung bage
ala mang maglambat,
tiyak a malaus
mibalik king lapag.
nung bagyu dinatang
tuknang ka saguli,
itikum deng pakpak
king lilim salangi,
kabang atyu ya pa
e pa mapapawi,
ing aslag ning aldo
panan mu ing pali.
tau man o ayup
atin yang paninap,
aliwa mebigu
nanu man ing sikap,
para managumpe
dalan mang e patag,
ali ka kukurul
lumabang parejas.
