Kapanwalang matwa nu’ ra ngan binasi
at tutukian ta la king angga man ngeni
bista’t salungat ya ing siyensya kaniti
dapot e la lubus mekalingwan deti
King siyensya bista’t man ating eksplanasyun
karing sablang bageng dinian dang atensiyun
pekatutukan do karing obserbasyun
mirinan pakibat karetang konklusyun
Anti ning ariya nung pakasuryan me
dakal a tatakut a salungatan de
atin mang katutwan o pala-palage
dapot deti e la kabud mu milele
metung a ariya nung ating mamangan
at ating mamako king bale ninu man
kailangang idurut do kanu ring pinggan
ban king mako alang malyaring nanu man
Nung mabuktut neman asawang babai
e dapat mangulkul kanu ing lalaki
anti mu rin ustung karas na ning bengi
bawal nang mamalis, mitapus ing swerti
O kaya naman king arap na ning kalang
ustung kakanta ka e kanu mayap yan
datang ing aldo a lubus mung pagsisyan
makapakyasawa ka king matwang sarang
E kanu mayap ing manipa kang ulun
ustu kanung ume neng ket ing dalumdum
atin lang ariya dikil karing ebun
e la miyapsa nung mirasan lang ayun
ustung lilibad no ding ayup-ayupan
malapit na kanung datang ing kauran
panabilin da pa e la dapat atwan
uling deti kanu lakwas lang darakal
Ding kasebian tamu ampo pang ariya
daramdaman ta la karetang makatwa
king kekong palage reti subuk nala?
at no ka-seryosu king bage anti ta
ding ariya dapat la kayang panwalan?
bakit deti e la lubus mekalingwan?
uling ing lohika a ken makabusal
ala namang marok nung gawan ta la man
dapot king kasebyan ating magpatutu
mayayakit at e kabud pigawa mu
talimhaga la man pero e la kuru
at king karanasan la reti mebuu
Mengari namu king dutung a mabasa
ustung milapit ya king aping bubugka
uli na ning paling kaniti magmula
pilan mung penandit kalabkab yang bigla
Alang damulag ing migtampiso labak
ing sinaka a e mu man mikaburak
at ing ayup naman e magdatun pitak
nung e ya manikwang lito-lito tugak
Ing luksu na naman ding gaindung kambing
maging ding biseru makanian la mu rin
nung masigla neman ing metung a tukil
alang laman kilub nun e purus angin
Deting mesambitlang ariya’t kasebyan
katali nong pusad kulturang makamal
bista’t durusug ya ing kapanyulungan
tutuki la reti’t e la malalakwan….
