Home Opinion Anino lubas

Anino lubas

847
0
SHARE

NENG pagumasden keng
Malale kukuldas ibat king katasan
Ing malare Aldo
A keta ume nang king bunduk magpampan;
King ulilang bili,
A makaba na ring bina ing biltangan,
Anti kung akakit,
King mapusyo aslag niti ing katutuan,
A ing aku pala
Ati na ku dane kagatpanapunan
Ning bie kung linipas
A’yalang malino bakas a melakuan;

Pablasang kanitang
Kasiknang-siknangan ding adua kung takde,
E ko inatyat man
King ikakayap na ning beluan kung tagle,
Nune lipat niti
Migpakasoso ku king matsurang bage
At kelinguan pati
Ing Dios a sukat kung suywan masalese;
Inia ing disan ku,
Kaibat ning makabang kakung pamaglakbe,
Anino yang lubas
A e ku maliaring pagmaragul king bie!

Migpakasasa ku
King bisyung mialiwa a e ikakayap
Ning kakung sarili,
A nabangnan mo sa’ king aldo ning bukas;
Salaping malaguang
Manik, tipa karing kakung aduang palad
Mistula mung danum
Mabilis tulandung kilub ning kabukas
Keni’t keta potang
Ding kabarkada ku keng ‘alta sociedad’
King Roxas Boulevard
Magpakalumud keng kakawe keng alak;

At keta mialiwa
Na la ring supling nang nunu tamung Eba
Ding akasiping kung
Metudtud kabukas king metung a kama;
Pero uling iti
Bisyu mu kanaku at alumon ku na
Yan mengari ku mung
Pakalipas pali ning katawan, inia
Kaibat keng dininan
Sapat a pera king kaku serbisyo na,
Mikawani kaming
Alang nanu naman, muli yang dili na.

Yan ing ngeni kakung
Gunam-gunaman at lubus pagmalunan
Kening kabilian ku
A’yanti na waring kaku binawi ngan
Ning Mayupayang Dios
Ing eganagana a binie Nang kalam;
Inia wayni, ngeni
King bili kung lubas king sadiang kanawan,
Mebating ing sabla,
At kaku ala nang bitasang mitagan
Nu’ne ing asu ku
A bukud abe kung king bie ku mitagan.

At magdili-dili
Nang mibebekut at mibatang kukusad
King bie kung ulila
A’yala na namang bitasang lilingap;
Ala na metung man
Karing kanita ken, mamabe kabukas
A suli nang Eba…
Nung inia nanu pa nu’ne na pagsalbat
Ing mitagan kaku,
King biling ulilang mebating na kislap
Ing eganagana…
Pati anino ning malagu kung bukas!

LEAVE A REPLY

Please enter your comment!
Please enter your name here