MAGANDA at pihong papuri’y daragsa
Kay Mayor sa kanyang planong ipagawa
Sa may paligid ng munisipyong luma,
Na inaasahang magbibigay sigla
At makapadulot ng ibayong ningning
Sa kapaligiran ng Poblacion na rin,
Na ayon sa kanya ito’y magsisilbing
Pinaka-parke o plazang maituturing
Ng Angeles city, partikular na riyan
Ang ‘heritage district’ na kinakailangang
Pasiglaing higit sa kasalukuyan
Upang maging isang magandang pasyalan.
Nitong taga lungsod ng Angeles mismo,
Mga turista at negosyante rito,
Na gustong mamasyal kung araw ng linggo
At makatikim ng lutong Angeleño.
Na kung saan tuwing ‘weekend’ papayagan
Ng city government na makapaglagay
Sa may harapan ng Museo’t Simbahan
Ang nagtitinda ng mga kakanin diyan.
At para magawa ng husto ni Mayor
Ang ‘beautifi cation’ para sa Poblacion,
Itong naghambalang na kable at kordon
Sa lugar na yan ay kailangang ibaon
Nang sa gayon itong parang spaghetti,
Na ‘telephone wires’ at kable ng kuryente,
Na nakakabit sa itaas ng poste
Ay mawala na sa’ting paningin pati
At mapaganda ni EdPam ang paligid
Ng ‘downtown’ lalo na ang ‘heritage district’
Sa pamamagitan ng pagpapaalis
Sa ilang ‘structure’ na nakapapangit.
Mula sa Pamintuan Mansion luluwangan
Ang kalsada hanggang sa may panulukan
Ng Sto. Rosario at daang Magalang,
Pati ang harapan mismo ng Simbahan.
At ang bahagi ng Sapang Balen pati
Sa gawing malapit sa City Library
Ay ‘concrete slab’ ang siyang magsisilbi
Na magpapaluwag sa dakong nasabi.
Kung saan ang bakod sa gawing kaliwa
Ng Museo’t dakong malapit sa sapa
Ay aalisin din (pati ‘Stage’ yata)
Na nasa gilid ng ‘city hall’ na luma.
Kasama sa mga tiyak na gigibain
Ay ilang ‘business space’ sa may parting
Likuran ng dating ‘municipal building,’
Na ngayon ay siyang Museo pa mandin.
Na inaasahang nitong unang linggo
Ng Nobyembre puedeng masimulan ito;
Aywan lang kung bago sumapit ang Pasko
Ay matatapos ang naturang proyekto.
Pero siguradong ang plano ni Mayor
Ay syento porsyento namang matutuloy,
Kung kaya sa lalong madaling panahon,
Gaganda ng husto ang buong Poblacion
Na inaasahang sa Angeles city
Ay paglagong lalo ng turismo pati
Liban sa posibleng higit pang darami
Kaysa dati itong dito namimili!
