Alben tamu nung ninu ngan

    74
    0
    SHARE

    NUNG TUTUNG y Congressman Oscar Rodriguez
    mika-transaksyun ya kang Janet Napoles
    inggil karing perang apulung bilyones
    a para keng ‘priority development
    assistance fund’ na ning ‘national government’
    karing mangaintulid miponduan a ‘project’

    Pero bandang tauli meyakit at sukat
    ing tune katutuan king bage merapat,
    at nu’ deti palang kualtang limpak-limpak
    pemulsa da la mu ding pawang mangayap
    tamung senadores ampon kongresistas;
    At nu’ pati y Oca lalto kasapakat,

    Keng PADAF scandal samantalang alus
    ala pa mang pabanua keng pangalukluk
    ning taung iti king Congress, kabud-abud
    king antiting bage bigla reng isangkut;
    Yan para kanaku misna king kalaut
    keng tune katutuan… ing atin yang talus!

    Uling nung tutu pin ing atin yang balu
    at ya midinan ya agyang kapurit mu,
    Laganas ila ngan o maski metung mu
    king Kongreso alang mitagan milapsu;
    a e misabit nung… ing anti katinu
    kang Congressman Oca akua nang paynabu.

    Ngaku wari balen, king buri kung sabyan,
    nung ding kalupa nang malinis, uliran
    at tune matapat keng pamanungkulan,
    itaya reti ing puri ra’t dangalan
    karing salapi a e ra pipawasan,
    ala nang matinung lunto manungkulan.

    Kilub na ning pilan ukdu nang panlukluk
    king Congress bayu ya San Fernando limput
    antimong alkalde, y Oca e misangkut
    keng matsurang bage o pangungurkot,
    Uling malinis a serbisyu mu kabud
    ing karing sakup na ganap mipagkalub.

    Y Oca talus ke lubus pangatau
    pati nung ninu ya keng obrang gubyernu;
    Ya bista man bait yang pakakalulu,
    e migsamantala keng telan nang puestu;
    Ing nanu mang ngeni king bili na atyu
    pipawasan na’yti at pegobran ustu.

    Inya nung inggil mu keng ‘pork barrel scam’
    a nu’ kabud namu king linto listahan
    y Oca kayabe ya karing miyambunan,
    Iti e mu grabing kaya kapanyran,
    nune pasakdalan pa ping kalaraman
    ampon pamilubid bage e katutuan.

    Y Oca kilub ning keyang siyam a banwa
    a pamanungkulan keng siyudad a nu’ ya
    meging ‘World Class City Mayor’ at ampo pa
    a mialiwang ‘award’ mipagkalam keya,
    mangaintulid mu ing mayap ya talaga
    at e ‘corrupt’ antimo ing bibintang da.

    Uling nung e linto malinis, matapat
    keng pamagsilbi na king likwan nang siyudad,
    Ot mekatatlu re inalal at sukat,
    at e re pelitan siyam a banwang singkad?
    Angga na king iti mapilit yang kuldas
    kaybat ning atlung ‘term’ nang alang balangkad.

    E king paglualu ke o anting kakampian,
    asabi ku mu ing kakung kapanwalan;
    Pero nung talagang ating katibayan,
    ing ya kasangkut ya king mesabing ‘scam,’
    Sulung, alben tamu karen nung ninu ngan
    ing ‘corrupt’ at dapat lungub king sukulan!!!

    LEAVE A REPLY

    Please enter your comment!
    Please enter your name here