OYAN, malapit na naman ing alalan,
Nung inya ding balang kandidatu kanyan,
Ati’no naman ken mamaniatang miuman
Karing sibabale karelang pamuntan;
Ing patapik-tapik at patalan-talan,
Pasibayu karen ya na namang miral;
Dakal la ipangakung e mabilang-bilang
King agyang balu rang mabayat tuparan.
E pa man, kilub na ning aldo-aldo alus
Akit tano’ namang king balen maglibut
At pakirasan ing pelalu kalaut
Dang baryu’t sitio ring lugal a sasakup,
Ba’rang kekatamu anting apayabut
Ing kapagnasan dang ngara makasaup;
Waman ding mapilan ing tune rang imbut
Mekad pansarili mu ba’lang milukluk.
Kilub ning aldo-aldo pamangampanya ra
E mu mamagkanu ing maging gastus da;
Ken mung para saken, krudu’t gasolina
Nu’re apanagiu ing maging sueldu ra,
Sakali man deti mikalmang mialal la?
Inya naman potang deti milukluk la,
Ing kalulung balen ya rugung magdusa
Keng kapanakawan ampon aliwa pa!
Menasa mengari lang magbebetu ren
A daratang mu pin karing sibabalen;
Buri rang ipakit tapat lang memalen,
King agya mang deti e la maratun ken;
Pero nung ngara mo ing imbut dang sesen
Ampon ipaglaban ing para king balen,
Marahil kaybat na… e mo man alelen
At ing katuparan e mu akit karen.
Pakapilinan te’t suryan miamasamas
Nung ninu’t insanu ing karapat-dapat;
E ta’ sa paytake king talan dang gamat
At pasingitan dang kualtang ipamitag,
Uling kaybat nita… king aldo ning bukas
Ing kalulung balen ya rugung mamayad;
Karing anti karen kailangan ta’ng mingat
Ban keta ing corruption lubus nang mapatpat.
Buryan ta’ pa waring magbalik ing napun
A meging mitsa na ning graft & corruption
Ing milalalu rang gastus neng eleksyon?
Obat e ta’ misip aliwang solusyun
A nung makananung munlad ing panyulung
Karing makataung dapat tang isubung?
Baket ibotu te’ing ginastus maragul,
Nung kaybat na nita manako ya milyun?
Kapilan man ela kaniting gubyernu
Makapanungkulan ding pakakalulu,
Nung ing balang metung karing pulitiku
Kualta’t pibandyan da itang lalon tamu?
Obat e ta’ suryan… lawan nung insanu
Ing kailangan yalal karing kandidatu,
Basi king belwan na’t AGYU NA NUNG NANU
At e king AGYU NANG IBIE NUNG MAGKANU?
(KANITA TA’ PAMU MITUD KETANG USTU
AT MAKAPILUKLUK TUNE LIDER TAMU!)
