SABIAN mo nung ninu ngan ding
parating pakiabayan mu,
Caibat pin nung ninu ica
at nanu ca klasing tau,
Ing sabian cu e magmintis –
itabac mu caniang batu…
Antimong aslag ning aldo
talus ku na ing dapat mu;
Iti king capilan pa man,
pacatanda-tandanan mu
Casebian de ring macatua
a mitatac king isip cu;
King nung nanu ing dapat da
ding taung pane abe mu;
Ica… antimurin naman
macanian cang siguradu!
Nung ding cabarcada…
masiba la caniang alac,
Natural mu king ica man
calasing cang e patawac;
Uling nung ngamu canacu
keng inuman e ca mapad,
Imposibleng maliari cang
careti makipagpuyat;
Ing casing taung makiabe…
misan pati keng e mayap
Cailangan yang makibage
caring cayang maging casap;
Agawa mu wari namang
caren ing e ca makiarap
Ngening ding cabarcada mu
keng inuman la sasagad?
Keta, nung ding parati mung
pakiabayan sugarul la,
Natural mung mabiasa cang
talan mu namang baraha;
At nung keng capanecasan
sane la at tutung biasa,
E melaut king ica man
mabiasa ca king balu ra;
At uling e imposibling
king maroc atake ra ca,
Mecad… e mu king macanian
mabiasa cang gawang pera;
Casebian ken ing sugarul
potang ala neng ipusta,
Canita ne maca-isip
mamisali king e caya.
Nung king mapanaco naman
carin ca bata’ng makiabe,
Ninung keca ing e misip
king dapat na e ca mabe?
King agia mang matunud ca’t
king antiti alang male,
Matucsu ca ban manaco
king kelambatan yung miabe;
Itang kilub ning aldo-aldo…
icong mitatanud pane
Alang e mu abalu king
calati-latian mang bage;
At alang manwala keca
king ica e ca cayabe
King nanu mang paniaptan na…
tikian me yan o ali me!
Nung ding kecang caluguran
durugista lang mamaltuc
Arapat mu cayang e ca
tacman agiang pasalikut?
(Ating yang kasuglung)
