Kung totoong itong ating DENR
Ay sadyang mahigpit sa kampanya laban
Sa ‘illegal logging’ at pagmimina riyan,
Imposibleng hindi nito malalaman
Na patuloy pa rin sa pamamayagpag
Itong kapural ng ganyang aktibidad,
Pagkat sila’y hindi mga pipi’t bulag
Upang di masilip ang laman ng gubat
Kung talagang sila ay nagtatrabaho
At ginagampanan nga nila ng husto
Ang tungkulin bilang kawal ng gobyerno
Laban sa ‘illegal’ at gawang di wasto.
Maliban na nga lang kung sila pa mandin
Na marapat maging kasangkapan natin
Para maputol ang ganitong gawain,
Itong kasapakat ng mga salarin
Kung kaya anumang gawing paghihigpit
Ng pamahalaan sa ganitong ‘practice’
Ay bale wala lang at di nadarakip
Ang nasa likuran o tunay na ‘culprit’.
Lalo’t magmula sa pinakamababang
Antas ng ika nga’y lokal na opisyal,
Gaya halimbawa ng Punong Barangay,
Ang alkalde at ang Sangguniang Bayan
Kasama pati na rin ang Gobernador
At iba pang opisyales sa Capitol
Ay nakatatanggap ng kaukulang ‘Tong’,
Natural lamang na di na kikibo ‘yon.
(Posible rin namang magmula itaas
Papuntang ibaba itong kasapakat,
Kung marahil higit na maluwag
Ang ‘illegal logging’ sa lahat ng oras)
Kaya suma total, Inang Kalikasan
Itong apektado… at ang resulta niyan
Ay itong kawawa nating kababayan
Ang pihong biktima n’yan sa kabundukan
Kapag nagka-‘land slide’ bunsod ng paglambot
Ng lupa kung saan natirik halos
Ang kanilang bahay sa gilid ng bundok,
Sanhi ng malakas na ulan o unos.
Gaya ng nangyari kamakailan lamang
Sa Cagayan de Oro at iba pa riyang
May illegal logging at saka minahan,
Kaya lumambot ng husto ang lupa riyan.
Matatandaang ang bundok ng Arayat
Ay naminsala rin noong nakalipas,
Dulot din halos nitong kahalintulad
Na pangyayari sa ibang komunidad
Kung saan marami itong nangamatay
Na residente sa isang barangay niyan,
Bunsod nitong wala ring kapararakang
Pagkalbo natin sa ating kabundukan.
Tulad na lang nitong sa General Tinio,
Nueva Ecija at kung saan diumano
Nakumpisa itong halos limang libo’ng
Board feet ng kahoy di alam kung sino
Ang may-ari nito ayon sa balita,
Ay kataka-takang walang nakasita
O nakapansin sa pamumutol yata
Samantalang ito’y lubos na naibaba?
Mula sa kung saang parte nitong bundok
Na pinagkunan ng mga nagsi-hakot
Sa naturang kahoy hanggang maipasok
Sa isang bodega o kaninong ‘warehouse’.
Humigit-kumulang sa naturang punto,
Imposibleng walang kinalaman dito
Ang ‘caretaker’ o itong may-ari mismo
Ng bodegang ito sa General Tinio;
Kaya marapat lang din naman marahil
Na ang sino pa mang posibleng sangkot din
Sa ganitong uri ng maling gawain
Ay kinakailangan ng pagdadamputin.
At pakantahin kung sinong nasa likod
Ng walang taros na pagkalbo sa bundok,
Upang sa ganun ay matigil ng lubos
Ang ganyan oras na pumasok sa loob!!!
