Y Tiagu pilan neng aldo lagnat-lagnat
Mamanguku ampon e mamako manas;
Nung kanitang aldo ya sadia neng payat,
Lalu ya pang ngening meging butul-balat;
At saka ikua nang mengabenat-benat
Keng katutukup na king lungga ning barag.
Dakal ne pemuntan karing Albularyu,
Ing lalto resulta e mipaparehu;
Nung ngana ning metung yan sakit king batu,
Sabi ring mapilan: mag-TB ne kanu;
Atin pang sasabing menunu yang pihu
O mekadalpak yang tianak iting Tiagu.
Mialiwa nang uyat, balat, bulung dutung
Ing pemanapal da, linaga’t pepaynum;
Ngara neng tawasan abak pang maranun
At santiguan keta balang gatpanapun,
Dapot ditak man king panulu rang yatul
Alang mekapaldan keya agyang metung.
Ding anggang tabletas sibukan na no’ ngan
At keta balu nang mayap makapaldan,
Dapot mekagisan neng metung a gatang
E pa murin rugu meyampat ditak man;
Angga na pin ketang aisip nang daptan,
Ing bantug a doktor ya’nang keyang puntan.
King kaligaga nang king doktor pa-tsep kap,
Munag-munag pamu ginayak neng agad;
Kaibat nang migmulmul, minum kape ditak,
Ing keyang asawa dapal na neng ‘nagkat;
Ketataglus da nang king dalan menabat
Karetang ‘tricycle’ a karin lalabas.
Mapilan penandit miras no’ king plaza,
A nung nu’ya karin ing doktor a biasa;
Tyempu namang deti e no’ menaya pa
Uling ala ya pang pasyenting disan da;
Inya agad-agad iti melawe ya,
At keta meyakit ing tune sakit na.
Linto, nung inya mu mangalbag ya bitis,
Maki rayuma yang king butul maniagid;
At natural kanung matindi ing sakit
Ning anti kaniting malambat na kapit;
Makanyan man ngana e ka paytigatig
Mayan pa yan kesa king maki diabetis.
Deting keka ngeni ibie kung panulu
Peka masanting la mabilug a yatu;
Ining metung ngana yang ipanapal mu,
At ing kadua naman ya ing inuman mu;
Dapal nong’ binie ring reseta kang Tiagu,
Kaibat nang melawe at memayad ustu.
“Katlung aldo ibat ngeni magbalik ka,
King ba’kung abalu ing maging resulta;
Yan, apipihu ku”, nganing doktor keya
“Antimong aslag ning aldo mipaldan ka;
Ala ku pang ‘nulwan a e mipaldan ya,
King nanu mang sakit a kaku detang da”.
Malagua’t salita minuli nong’ agad
At ing penabilin yang tikian nang mayap;
Tinapal de’ing metung a nung nu’ya dapat,
Antimurin keta ing painum at sukat;
Aba, e pin naman miliban kabukas,
Milako ya kuku at e ne melagnat.
King sobrang tula na ampon kakusuelu,
E ne menaya pang katlung aldo’y Tiagu;
Kabukasan murin king doktor atilu,
Bista’t itang bilin e pa mikumpletu;
At ngana king doktor masayang migkwentu:
“Kagaling yu pala talagang manulu!
At saka ikayu e ra ko’ kalupa,
Ala kong’ pasaling ibat king botika”;
“O nang’ penulu mu?” nganing doktor keya,
E mu pala seli ing maka-reseta?”
“E wari pu doktor binie yu la reta
Kaibat ming beyaran ing para konsulta?”
“Wa, detang reseta a keka binie ku
Karin makasulat itang pasali ku;
Ing para konsulta ya kabud singil ku,
Uli ning ala kung inabe panulu;
Ngeni, nung ala kang seli agyang nanu,
King maka-reseta, nanung pemalit mu?”
“Deta mu pu mismu, ala kung pelitan,
Ing ‘gang sinabi yu ya’mung kakung tikian;
Itang metung ngayu ya ing ipanapal,
Atyu pa pu kening gulut makatapal;
At ing kadua naman a dapat inuman,
Nayun king bilin yu ininum ku neman,
(Kaibat keng linaso king basu denuman!”)
