Iti ing kakantio ra keng pahayagan
At patuya ra pang kekata kukutang
Ding e kapanalig ning kekatang sadiang
Pamuntuk ning Bansa, Gloria Macapagal.
King pamanahimik tamu kanu ngara
Inggil king maselan a meging problema
Ning Cabalen tamung ngeni Diputada
King ‘2nd District’ ning mal tamung probinsya.
Masakit para kekatang Kapampangan
Ing malino pamang-gipit dang itinan,
At kelan respetu nung e man direktang
Insultu kekatang liping Kapampangan.
King nanu mang oras agyu tang’ magmartsa
Libutad ning dalan mabilug Pampanga
Ban igulisak ing sakit lub karela
King e makatau a pamaniaptan da
Ding galame ning bayung administrasyun
King prosesung legal a sukat isulung,
A lalabagan da ba’ riang apakulung
Ing taung imbut dang mate keng pagmalun.
(At nanan da namu ing ‘due process of law’
E ra ibie kening taung bisang mako,
Kabang ‘Supreme Court’ ne ing minie ‘TRO’
Kang CGMA ken, king ba’yang milako).
Makanian man maka-panaguanta ta’ pa
Uli ning ya mismu ipanabilin na,
Ing e ta’ lalabag karing batas ngana
Kapamilatan ning magulung protesta.
Inya busten ta’ pang king ‘highest tribunal’
Ning bansa, ing keyang apela maramdam,
Antining atin tang’ lubus kapanwalan
King ing ‘supremacy’ na e mibabawan!
Igagalang tamu ing tune hustisya
A bali-ala mu kang Leila de Lima,
Lacierda’t aliwa pang alipores na
Ning administrasyon a mamulitika.
At ining Judge Mupas, a nung makananung
Ikua neng abasa ing abla o sumbung
Kilub ning ala mang alus patingapun,
Mekapagpalual yang agad Resolution?
At ‘warrant of arrest’ laban kang Arroyo
Nung alang milyaring nanu mang milagro?
At pamangabiran king mesabing punto
Ban y CGMA masipit yang ustu?
O lilisya na mu ning Administrasyun
Ing tune isyu ban kang Gloria mipukul
Ing anggang parsala king alang panyulung
A ekonomya tang’ lalung mibakulkul?
Antalu at bakit itang Kapampangan
Menahimik tamu nganing kakantyo rang
Alang patugut ding e na kakamping Mam,
Ngening atiyu king antiting kabilyan?
Wayni ing pakibat – king talasulat yu
Peparalan da ring ka-probinsya tamu:
Tahimik a ilug malalam ya kanu,
Dapot iti atin yang tagle peligru;
Ing katahimikan a makapangaklak,
Delubyu menasa, katuki na’t sukat;
At sana itinan e na sa’ miraras,
At ing mangibabo… ing Saligang Batas!
