Kung totoong pilit na pinapipirma
Ng Wan Chiong ang mga trabahador nila,
Ng umano ay kusang pagbibitiw na
Gayong sila yata’y lampas sa ‘8 months’ na
Yan ay malinaw na ‘unconstitutional’
At maituturing na grabeng pagsakal
Ng kumpanyang itong tunawan ng bakal
Sa karapatan ng taong tinatanggal.
Pagkat matapos ang panahong naturan
Ay permanente na dapat ang mga yan,
Kaya’t para sila’y pilit papirmahan
Ng ganito, saka ya’y gawing ‘contractual’
Ay pang-aabuso na nitong nasabing
Kumpanya sa mga kababayan natin,
Kung saan ang ‘security of tenure’ din
Ng lahat tiyakang walang mararating
Bunsod na rin nitong bilang ‘contractual’ lang
Ay natural lamang na ang karapatan
Ng isang empleadong dapat panagutan
At ibigay nitong ‘employer’ ay kulang
At anumang oras ay puedeng tanggalin
Ng ‘agency’ itong sinumang naising
Itiwalag at/o maisip sipain
Para makatipid sa mga bayarin.
Gaya na lang nitong nasabing kumpanya
Na ayon sa ilang kwenta kumonsulta
Kay abang lingkod ay tila pinupuwersa
Silang magsibitiw sa trabaho nila.
At diumano yata ay pinangakuan
Na makatatanggap yan ng kaukulang
Kabayaran oras na nagkapirmahan;
(At kabilang pa rin sa manggagawa riyan?
Pero matapos lamang ang ilang linggo
Ay sisipain na para laging bago
Ang kanilang mga kukuning empleado
Na kulang sa lahat na ng benepisyo?)
At ang isang bagay na napakasaklap
Ayon sa ilang ating mga nakausap,
Ay itong kung bakit nag-‘hired’ pa sa labas
Ng ‘supervisor’ na wala namang utak.
At ni katiting na ‘English’ di marunong
Kaya malimit ay ‘miscommunication’
Ang nararanasan nitong mga Pinoy
At mga ‘import’ ng ‘management’ ng Wan Chiong
Sa ‘operation’ niyan, kaya kalimitan
Ay medyo palpak ang trabaho kung minsan;
Pagkat ang ‘import’ at itong ating lokal
Na manggagawa’y di magka-intindihan!
Ang daming kabalen nating magagaling
Partikular sa ‘technical’ na gawain,
Ano’t sa labas pa n’yo naisip kunin
Ang ganito, gayong dito’y marami rin?
At saka ano’t de baril pa umano
Itong saksakan din ng yabang na Tsino?
Na ayon sa ating nakausap mismo
Ay pinagyayabang ng lintik na ito?
Di ba’t bawal itong magdala ng baril
Ang sinuman lalo’t sa labas pa mandin
Ng ating tahanan kung ya’y walang papel
Na ‘permit-to-carry’ kung saan dadalhin?
Kung totoong lahat ang ating nakalap
Na impormasyong yan ay mangyaring agad
Kumilos ang ating mga otoridad
Upang sitahin yan sa gawang paglabag
Pagkat di malayong ang nasabing baril
Ay sa karahasan po nila gamitin,
Tulad na lang nitong nabanggit na natin
Na pagmamayabang ng Tsino dito sa ‘tin!
