Indung Kapampangan
Busten mung misan pang keka ipagsulit
Ining malambat nang
Sukal lub kareting king bie mu mumugit;
Pagmulalan ku mu,
A nung baket kanyang bili ra mas igit
Ing pakamal da king
Salita ring daywan o salitang inglis;
At nung baket liyus
King kekang amanu ilang munang sagip,
Ila pa ring alang
Masabal king Sabing lulumud dang pilit.
Baket liyus ketang
Pakamalan de’yti at gambulan mayap,
Banting manatili
Keting lalawigan ing bitbit nang tindag,
Oren, Indung Balen,
Ding magkukunwari a keka malingap,
Pikarine re mang
Gagamitan iti king tamak a oras;
A’yantimo pin neng
Ing Aldo mung Beytan yang datang o miras,
Ding mamagsalita
Menasa palipi nong’ SAM at BALAGTAS!
Makananung musbung
Ing kekang Salita mal kung lalawigan,
Karing anak mung den
A mistulang pipi king Salitang menan?
Mayayakit kasi
A nung insanu ring sukat tang’ aligan,
Ila pang papalbug
At alang interes king Amanung Sisuan;
Nung inya ing Sabing
Memukud at alang kapara king legwan,
King paritak-ditak,
Malulumpawi ya king dila ring dakal.
Nu’no karin detang
Kabalen ta’ napun a tune malugud,
A’yanti ri Cicer,
Ning San Simon at y Titong ning Baculud?
Ala na wari mang
Karing salukuyan ngeni makalukluk
Ing ating masabal
Pati king kulturang pamana nang Crissot?
Busten mi’nia waring
Keting lalawigan bigla namung lumbug
Ing Salitang iti
A keka at kaku – ing Dios yang migkalub?
Kalulung balayan,
Nung e namu wari kareting Poeta,
At mapilan namung
Talapangambul king arte at kultura,
E ne miuman musbung
At lumabung iti antimo ing sadya?
Karampatan wari
Ing masintang ya’yti at ma’yalang kwenta,
Pasari namu ning
Kelan dang masabal ding anti karela?
A mas dang pepaygit
Ing salitang andam kesa king Sisuan da!
Salamat, kaibat ding
E ta’ paniglon a mitatang artista,
A mituking meging
Gubernador keti kekata Pampanga;
Ing kekang Salita,
Mibangun yang miuman king pangapase na,
Niang maging batas ya
Ing tauling Biernes ning Agosto kanita’ng
Panaun nang Among
A maging “Aldo na (keti king probinsya)
ning Amanung Sisuan,
A sukat tang’ pagmasusian banua-banua;
A ngeni sindu na,
Ning kagalang-galang a Gobernadora,
LILIA G. PINEDA,
A maki-masabal king Salitang mana!
