SAMAL, Bataan: Pasigla na ng pasigla ang kampanyahan sa Barangay at Sangguniang Kabataan Elections sa Bataan tulad sa Barangay Sta. Lucia sa bayang ito sa pangalawang araw na ngayong Biyernes.
Halos kasisikat pa lamang ng araw ay naghahanda na ang mga kandidato sa kanilang pagbabahay-bahay samantalang tila umaatungal ang mga sound system sa mga campaign songs.
Ang mga kandidato sa pagka-Barangay chairman, kagawad, SK chairman at kagawad ay makikilala sa kanilang mga suot na T-shirt.
Sa Sta. Lucia, halimbawa, dalawang grupo ang nais makasungkit sa puwesto ng Barangay chairman at isa sa pitong Barangay kagawad at SK chairman at isa sa pitong SK kagawad.
Ang isang grupo na pinangungunahan ni reelectionistang Punong Barangay Hector Forbes ay nakasuot ng puting T-shirt na may kumbinasyong kulay asul samantalang ang grupo ng mga katunggali sa ilalim ni Podek Valerio ay puti rin ang T-shirt na may disenyong asul at dilaw.
Hindi lamang ang mga kandidato ang nagbabahay-bahay kundi kasama nila ang ilang kaanak na may bitbit pang mga bata at supporters na namimigay ng maliliit na campaign materials. Nakadikit naman ang mga posters sa mga pader, bakod at tricycle.
Puno ng ngiti, kaway at bati ang mga kandidato sa kanilang sinusuyong mga botante na para bagang noon lamang nila nakita at sabik na sabik na makadaupang-palad. (30)
