King nanu mang bage, e ta’ magmaligwâ
ala nang muna keng e makipangalma,
uling magkang pota, ing banal a nasâ
liyus makakayap, muli ngan king alâ.
Nung ing kekang buyut, banting mibalayun
miyaliwang proyektu, a pengaku napun,
e mu luluban ing maskup a sitwasyun
a kekang pagsisian, datang a panaun,
E ta’ kakalingwan, ing lulut king pilit
a bungang tanaman, ila ring mapait;
At ding ketubasan ila ring ken sagid
keng yumu at alang ipintas unabis.
Ala nang muna keng ngara pin maingat
king mialiwang bage a e mu pa sanak;
ken ding mitalabu, a magpaparagas
matning asabi ku ing e nala ditak.
Nung nu’ la mu anti melakwan a pondu
a makarikil keng mialiwang proyektu,
nung e man mayari, balu ra ring tau
ing ika tinupad ka king pengaku mu.
Nung magkanu la mu ring disan tang pera
ila ring gamitan, mibatang manaya;
e ta’ daraptan ing ken mamagdilensya
karing miayaliwang sektor at pabrika.
Mibata ta’na pang manaya king nanu
ing maging dake keng pambansang gubyernu,
ban maging malinis keti kekatamu
ing nu’la miraras banwaan ta’ng pondu.
O tatanggapan ta’ng, IRA, banwa-banwa
a sukat ipaskil ken king opisina
ning ‘budget officer’ ban malino tala
namang ababalu nu’la mipupunta.
Banting pati na ring kekatang Kabalen
malino akakit nung magkanu la ren,
at e itang pamulsa da’no pala ken
ding aliwa e na pa balu ning Balen.
E bali ing maluat, bayu la mayarî
ring anggang proyektung, nasa yung ibusnî
siguradu mu sa, at e ya mibilî
king alanganin ing balen nung sakalî.
Ngana ning kasebian, ding taung maglakad
masalusu ilang, pane misasakab;
at detang manene, malwat la mang miras
king puntan da akwa, ra namang misadsad.
Karing mapaniulsul, e ko makiramdam
lakuas na nung dikil, king “KAPANAKITAN”
uling ning menasa, ing keng kaisipan
ding makasarili, solung kapagnasan.
Uling nung sakali, lunto ngang kapeltus
ing payul da reti ampon pamanabluk,
bitbit yung dangalan, ing masirang lubus
aliwa ing lagyu rang pakasalikut.
Misip kong banayad, at e bisubisû
ban kanita e yu akwang mitalabû
at e yu kakawlan itang e yu agyû
pota bandang tawli, sumisi kayu mû…
Vhelle V. Garcia
San Simon, Pampanga
