HAGONOY, Bulacan — Patay ang isang senior citizen na tricycle driver matapos na pagbabarilin ng hindi pa nakikilalang mga salarin na lulan ng isang SUV sa Purok 4 Barangay Iba-Ibayo ng bayang ito.
Ang biktima ay nakilalang si Renato De Leon, 60, residente ng nasabing barangay.
Ayon sa ulat ng Hagonoy police, minamaneho ni De Leon ang kanyang tricycle Linggo ng hapon nang bigla na lang harangin ng isang kulay puti na SUV at bumaba ang isa sa sakay nito at pinagbabaril ang biktima.
Matapos ang pamamaril ay agad na tumakas ang mga suspek at iniwan ang biktima na kagyat na namatay dahil sa mga tama ng bala sa katawan.
Inilarawan ng mga nakasaksi ang gunman na nakasuot ng itim na facemask, kulay puti na damit at itim na pantalon.
Ayon kay Aileen De Leon, asawa ng biktima, umaga nang magpaalam ang biktima para mamasada at papauwi na sana ito ng bahay ng hapon na iyon nang maganap ang krimen.
Blangko daw sila sa kung sino ang mga salarin at motibo sa pagpatay dahil
wala silang alam na kagalit ng biktima at wala naman itong bisyo na maaring kasangkutan.
Panawagan niya na sumuko na lang ang mga salarin at magkaroon ng hustisya ang pagkamatay ng kanyang asawa.
Samantala, patuloy pa ang imbestigasyon ng kapulisan sa nasabing insidente.
