NANDIN kabang makarap ku king tokador, magsalamin
Mipakde ku’t anti ku mo’ng matudtud mebiglang gising;
King kekaban ning panaun a miralan, e ku pansin
Malaut na palang bina ing disan ku keta’t karin;
At nung bakit ngeni ku pa king sarili ku apansin,
Melagas ne bandang kanwan ing buak kung sadyang matuling;
Ala na mu naman karing mata ing sadya rang ningning
At umpak ne ining pisnging, kanita atmu king santing.
Mebalag no’ng kakung kile, mengulimpis na ing balat
Ning lupa kung kapilan man e mimansan keng daliawat;
E no’ pante-pante tubu dening meputi kung balbas,
A bina rang pengawilyan ding dalagang e mu ditak;
Pablasang kanitang akung kabayangnan, anak-anak,
Meging pyalung mu kanaku ing sintang awsan dang wagas;
E ku pamo balung aku mekipalsinta kung tapat
Kenu mang Anak nang Eba a kanaku pepaybulag.
E la pilan ding babaing tinangis ampon migmalun
King uli ning pamalsintang kaku mengari mung pyalung;
Kanita, katula ku pang makakit king balang metung
Nung akung pipapaten da king makanyan a relasyun;
At uling bina ku namang king sarili pagmaragul,
Ing aku maging ‘macho’ ku king makanyan a situasyun,
Lalu na pang katitilus nining matikmus kung arung,
Ing antiting papuri ra a kanaku ipatungkul.
Keni’t keta laman da ku ding libangan a pambengi,
A nung nu’ mialiwa na la ring sipingan kung babai;
E la ditak ding salaping linaso ku uli reti,
King ba’kung adinan ganap kusuelu ining sarili;
Pero, at nung bakit kabang makatangab ku kaniti
Karin ku mu makaramdam ligayang e ku asabi;
Uling kaybat, aku namang sariling lub a sisisi,
Lalu potang aku namung king silid ku dili-dili.
Kelambatan ning makanyan a kanakung pamibie-bie,
Ditak-ditak… ing sarili, king antiti sasawa ne;
Tikman ku na alus itang e ‘nabis mumuli bale,
Ngaku nang makitudtud mu o karing otel mas pane;
Alang managkat kanaku a e mo sana tikyan ke,
Lalu dikil king ‘good time’ a den parati ko’ng kayabe;
Ala metung man karen ing asabi rang eku binye
Ing nanu mang kailangan da a kanaku ra lilele.
At pablasang mapera ku, aku itang mipamintwan
King nanu mang maging lakad a kekaming pupuntalan;
Misan, agyang nanu mu’yta kaku ra pa ipamun ngan
Uling alang eku buri a ipilit deting gawan;
Ultimung pamandilu ku maybug da’pang pisamsaman
Nung ninung misadyang danum o mipali nung kailangan;
Pati pamanamalid ku maybug da pang pakialaman,
King ba’rang ipakit mekad ing malugud dang kasuywan.
kasebyan, agyang bunduk ya nung pane yang makukulkul
Magisan ya o mapatag king kekaban ning panaun;
Inyang ding kakaluguran a kaku sadyang maratun
Ala na’lang akwa kaku o malyari kung ipaynum
Anti na ning bangkak na ku naman keng kau kung inum,
At kareti ala na ku namang malyaring idaun;
Kanyan no’ patunggal-tunggal e minta kakung mansion,
At ala na kung akapkap man kareti agyang metung.
Nu’no karin detang bagyang kabit kaku makapalad
Baket ngening lipit na ku likwan da ku king pagsalbat?
Ante itang amanwan dang pamakyabe alang kupas,
At e la magbayu kaku, ngara “miras na ing miras?”
Ing pyakitan wari keng bie, atyu kislap da ring pilak,
Potang ala ne keka’yti, ala na ngan ing milabas?
Ding kanita sibwanan kung karing kakung aduang palad,
E ra na ku bityo man den ngening ganap na kung lupad!
Iti ing kemaulyan ning sobrang kakung pamangastus,
A nu’ mingatba kung bulsa anti la waring mebusbus;
Panyali mang ‘yosi’ ala na ku mu namang agauk,
Lipat ke pa ing pulubing milalabas mu keng limus;
Maralas mamaniawad ku ba’kung makasangap asuk
Lalu na neng benging maybug da kung pagpyestan deng yamuk;
Ing amana kung pibandyan, mimin, megisan mepupud,
Ining tukud nang Apu ku ya’na ing mitagan kabud.
Aisip kung balikan ke ing metung kung akautus
A medyu melwat mo’ng bagya a kanakung akalukup;
King agya mang marine ku ampon makitagle takut,
King ba’kung ating aulyan… sabla pilit kung inukuk;
Nung atanggap na o ali ing lumapit manyiklaud,
Yan ing sana isuku ku king kanakung pamandurup;
Kabud mipatawaran ku kening pamagbalik kung lub,
Isumpa ku ing e ku ne, lakwan, ikeng miyabe lubus.
Malaut pang anting sukad soga king keyang tuknangan
Abatiawan keng mamalis king karelang palbibewan.
Kaybugan kung lapitan ke, kawlan sana’t saka uman,
Anti na’mong biglang sebat ning tinipa ketang eran;
Ikit kung lepitan ne’yti, siklit malale awakan
At saka ne inuma ing pagnasan ku sa’ng balikan!
Malino pyakitan iti, e ku ne dapat lapitan,
Uling atin nang mas migit, anak a makitetagan.
Ngening matwa na ing bili, ala nang sikanan ganap
Buryan ku man ing magbayu… tauli na’t ala nang lunas!
At uli ning e na’kurin makapagobrang mabayat,
Angga mu keng mangabiayan ku keng limus bandang bukas?
Keta, at nu’ ining bie ku akwa nang kumabang ditak,
Akwa ku pang makasisi king sablang sala kung depat;
At ban keta bayu mu man mapatlud ing tauling singap,
Akit ke ing sarili ku… basbasle king ustung landas!!!
