Misan, akamuan ke
Ing siping kung bale;
At yan uli namu ning tenam kung pale
At keta’y nasual na ning babi nang sese;
Makanano, liyus ketang itali ne
Aku kanung dapat king dayat magbante;
King makanian abe
E ka makipate?
Matulid a bukut
Ing king keyang buntuk;
At yan para keya king agiang baluktut,
Basta’t apilit na… keka e paysambut;
Pero, ibola me – ken ya maina kuyug
Agiang pasalangsang akua meng adurut;
Kase, ya pa kabud
Ing miyapsang buguk!
Keya ka makitua
Ala kang apala;
Yan, e me asaul, sambutan bitasa
Patingapun ko’ mang manyayang mung wawa;
At saka metung pa… abe’ing maki-gaga
King lalaking tau manawang a bina;
Ngening e ya tula
E ke’ panupaya?
Ngana ning matulid:
Patulan me’ing murit,
Migit kang e palak malabno pamisip
Kesa king mibantuan toyo ampon patis;
Inia ban e namu kakaba’t susulit
Madalas… aku na ing kusang payraig;
Kase, e mia’ pilit
Maus ka mang pulis!
Aku, anti na ning
Balu ku neng muting,
Misan king sarili aku nang mamigil
Banting e na miras yan king e masanting;
At saka metung pa, intindian ku murin
Ing akung mapintas nung patulan ke pin;
Agiang deng kasiping
Ken de sasaingsing.
Madalas maliari
Uling lumo niti,
Maski nanu mu ita pansin nang parati
Pati na nung misan maging bisita mi;
Ala kang asinup a damdaman niti
A e na ilipat king baryu isyeti;
Bisyu na’na kasi
Ning dipa’ ning kai!
Balu na’ing musing da
Ding taung karap na,
Dapot iti nung yang magsalamin keta
Dobli ing akit nang dusing king lupa na;
(Tabalu nung baket ating anti keya
a magmamalinis pero marusing la)
Iti sakit da na
Detang masitsirya!
Balamu nung ninu
A matinung tau;
At yan bisyu na ing karing pulitiku
Mapanataki ya ampon maki-argu;
Pero ninu na ing binitbit na ngayu
Ing sinambut agiang Kapitan mung baryu?
Wayta, keng balu ku,
Talunan lang puru!
Yang taung makitid
King keyang pamisip,
King nanu mang bage lalto lang masulit,
Mabayat isplikan, king mayap isunis;
Kase, kapilan man ing taung malurit,
Yang keraklan keta e bisang paylupig;
Atiu ken ing sakit
Ding alang kasunis!
Keya ka makiaskal,
Alang akuang galal;
At ken lunto kaming parehu mung balbal,
King metung at metung alang ikarangal;
(Nanan te’ mo ngeni king mali nang asal
nung king parang-tau ala yang masabal?)
King pelalung banal
Iti, maging siwal.
Kasebian, keng kalbu
Nanung agunut mu?
Inia naman mekad mayapa’siguru
Angga namu pin keng manunupaya ku;
Uling agiang kasing makapakananu
E ke sambutan keng bukut nang prinsipyu;
At nanung akua ku
Nune basagulu?
At yan uli na pin
Ning kemuan ke nandin;
Silatanan key’ti king metung a papil,
Ing anggang palmura sinabi ku karin;
Kaybat, ing gewa ku… yan silab ku murin
King ban mikaluku ing mua kung dirildil
At ngeni, wayni pin
Iti meging uling!!!
Nobyembre 15, 1997
