SUBIC, Zambales—Anim na suspected drug pushers ang dinakip ng pulisya sa magkakasunod na drug operation sa tatlong barangay sa bayang ito.
Sa ulat ni Chief Inspector Oriano Mina, hepe ng Subic PNP, naunang nasakote sa Barangay Cawag sina Ricardo Catalonia, 29, ng Barangay Matain, Subic; Baby Dabon, 51, ng Riverside, Barangay Lipay, Sta Cruz; at Edwin Sabinda, 32, residente ng Purok 7, Barangay Del Pilar, Castillejos.
Ang mga suspek ay dinakip habang nagbebenta ng isang plastic ng shabu sa isang police asset sa halagang P500. Nakuha sa pag-iingat ng mga suspek ang marked money, 11 plastic sachet ng shabu, isang .9 mm pistol na may walong bala at isang Toyota Vios (TOM- 399) na umano’y ginagamit ng mga suspek sa pag-deliver ng droga.
Sa Barangay Asinan Proper, huli ang mga suspek na sina Melvin Ellano, 25, ng No. 127 Murphy St., Barangay New Kalalake; at Florencio Miclat, 50, residente ng No. 1418 Tabacuhan, Barangay Sta Rita, pawang sa Olongapo City.
Nakuha sa pag-iingat ng mga suspek ang may 23 plastic sachet ng shabu, marked money at isang Toyota Vios na walang plaka na ginagamit sa illegal na operasyon.
Huli din sa Barangay Ilwas, ang suspek na si Jason Bhorg, 30, ng No. 39 Gordon St., Barangay New Banicain, Olongapo City makaraan itong magbenta ng isang plastic sachet ng shabu sa isang police poseur buyer sa halagang P500.
Nakuha sa suspek ang marked money at dalawang plastic sachet ng shabu.
