Nung ating maburi keng putahing Intsik
metung ne i Pisuk, lalu na nung pansit;
Iti agyang yamung ulam na dusuldit,
ing sunlam ya lupa malaut mung akit.
Bukud keng gisadu, ing kapad nang lakwas
mami o sebawan a mamaras-maras;
Inya naman agyang nu’ya lugal miras,
kaya e problema ing mirasan oras.
Misan a tikatik ing patak ning uran
king Mamon Luk, Quiapo aisip nang mangan,
Ban ing mami keni akwa nang atakman
antining iti pin binang kabalitan.
Kabang panenayan na ing inorder na,
ining Pisuk medyu magugumasid ya;
Ikit na… ding mag-serve alus lalaki la
at asna kabilis ing pamanistima.
Malagua’t salita inapag ning Waiter
ing mami at siopao a keyang inorder;
At ngana kang Pisuk: “Okey na po ba, sir?
baka mayrun pa po kayong ibang “order”?
“Wala na, yan lamang” ngana nining Pisuk,
king Waiter a keta ume neng gumulut;
Kaibat nang ginogo ing laman ning mangkuk,
ing mapaling sabo aplit nang penilup.
Meyama yang bina i Pisuk keng lasa
ning Mami a keta inapag da keya,
Inya naman itang takam ning asbuk na
daig ne bilis ing potrung pangarera.
Pero penandit mu, mebagal ya langut
inyang aramdaman na king keyang asbuk,
Ing ating “noodles” a e’na langut-langut
at agyang nanan ne, kukunial ya kabud.
Inapsa ne iti…a keta malino
ikit na king iting miyabe king silyo,
Sintas yang sapatus a manilo-nilo
keng pangababad na king mapaling sabo!
”Waiter” nganing maybug mikalukung Pisuk
mekeni lon mu’y ini” (e ne menagalug;)
“Nanu pu ita, sir” (e pala Tagalug)
“Ining mami ating sintas ding sapatus!”
”Ay, salamat pu sir, dakal pung salamat;
ing tutu na pu nyan… den napun pang abak
payntunan ku na na la – e ko pu akapkap
ban pipian uli ning asno’ king karinat;
Sir, ing kaparis na…anting dapat mayap,
ban e na ku mu pu magal pang mangapkap;
Paki-tsek yu ne’mo keng tagan yung ditak,
pota atyu mu ken e ye ikit agad”!
(Nung keka malyari pare ing anti yan
e ka mikalabkab at maybug sagapan
ing Waiter a yutus na pa ing gisanan
mu ing mami magkang atyu keng mitagan?!
