“Atse,” nganing taung mengutang nung nu’ya
Karin ing tuknangan na ning Kapitana;
Ining kitnan, agad-agad tinikdo ya
At marapal likwan itang pipipyan na.
“Ima, ima” ngana “ating bisang sali
Karing bigak na ning gayndu tamung babi”;
“Asus, asus” nganing Inda “e ku buri
Ing kareng maglolo e biasang mamili;
Miyadia ka, panyatang na potang Tata mu
Alang kapilisyan kaya isumbung ku
Ing ika, misan me pa ikit ing tau
Maligaga ka ban papanikan, ngaku”
Tiyempung kapanik na ketang oras a ita
Ing mamagal-magal a karelang Tata;
“Ay, mapnamu” nganing Inda, atiu na ka,
“Ing anak mu bisa nia’tang makiasawa!”
“Buwisit” ngana niti king matuang babai,
E na ka sinawang kakatak parati;
Nanung marapat nung e menikua ngeni
Itang inumang kung patukba nabengi?”
Asus, pamilya la palang sobra kaklak
Dening atupan na ning magtindang darak,
Nung inya uli ning puru la ngang maklak
Ing pakibat deti e mikakatulpak!
(Nung ding komikerung alyas da Pusoy Dos
Ayalben yu nala, ing inggil keng atut,
I Rico, uli ning yan mung kayang atut
Keng pakiramdam na biung da na reng yamuk
Misan, aganaka niting ikonsulta
King metung a doktor, a espesyalista;
Ban ing problema nyan karing balugbug na.
Maulu ngana pin agyang magkanu pa.
Kaibat neng sinyasat mingatbang balugbug
Ning doktor, ngana n’yan “areglado na boss
Karening ibie ku, andred percent alus
Mipaniaman pati na ing kekang tudtud.
“Atlung beses” ngana’ing karen pamaninum,
Abak, ugtung aldo, tandanan mu metung;
“Makananu pu ing epekto ra doktor?
“Iho, mabawas ing kekang kunsimisyun”
Nung ngeni sobra ka pin kayna balugbug,
Natural na kareng tutwa, mayna intud;
Agyang nu’ka anti kanyaman a tudtud,
Masdan ka, uling pakasingan lang atut!!!).
