Inyang mirate ya keng dase i Tasyu
angga king bayu ya rugu mag-ingalu,
Metung mung bage ing buri nang abalu
king keyang asawang e kinupas lagu.
Iti malwat na nang pagnasan ikutang
oneng angga mu king pane mapapakdal;
At ngeni nia mu pin mesikan a lub yan
ban king esposa na ibuklat itinan.
Ya’ytang obat karing apulung anak da,
ing bungsu ya kabud ing tiktak katsura;
Kabang ding siyam pogi at mangalagu la,
inya anti keni ing pakibalwan na:
At iti nung kenu ne kanu pengagli,
ing bungsung anak dang kabuntuk at piki;
Kabang mangalagu la pin ampon pogi
ding kapatad niti a mituki-tuki.
Mabilis lepitan neng Denang king papag
i Tasyu antining ta’ne asdak-asdak,
Mangisnawa ampon maybug nang
mapatad sinawa kabang aplit yang sesenyas.
“Ing kutang uli ning ibat na rin keka,
r mu sa’ ikamua pakibatan ku na.
Dening siyam, ing tutu – mialiwa la tata,
ong bungsu ya kabud ing talagang keka”…
(Ay rugu, nung kekata kaya malyari
sabyan ding misis ta’ ing anti kaniti,
Mekad akua te’ pang abalasbas iti
keng buntuk ning palis ing dipa’ ning alti.
O nung ali kaya pihung salikadkad
ta’na ka mu kabud keng babo na ning papag
Nung anti kanyan ing kusa nang ipasyag
ing yan keng kulambu lulual ya madalas.
Inya nanu’t e ya mayasiad a buldit
lareng bulugan a yamuk a dusuldit
Kilual ning kulambu parating sisisit
neng kapitangan na ning benging tahimik?
Lalu’t i kumpare pane yang marimla
o kulang a pali keng lambis, romansa
At aliwang sangkap ning bie talasawa,
a paninintunan ning ‘Anak nang Eba’
Inya ngaku na ping mamiru nung misan
larening kabaru tamu at kakintal,
Ba’tamung e mika-dungis a dangalan,
Den e la pabusten ken pawasang-wasang.
Nune ibie tamu ing dalise lingap,
Lugud, panalala, at ing tune sangkap
Ning bie bilang Adan, kang Eba e sukat
Ipagkait indat datang ya lingapngap.
Uling natural mu karing ken mahilig
king lutu ning Ginu ing e makaisip,
Kusang ipalual keng kulambu ing buldit
ning babaing ngara sobra king kalarit!
