NANDIN, king bistaman e ku balak simba
At e na ku man pin binang mapanyimba,
Bigla kung aisip ing panayan da ka
King ban makiyagnan simbang bengi keka.
Balu ku, pilan nang bengi ing milabas
E ka pa migpalyang linub king bisitas,
Makasigurung kung king antitang oras
Arapan ming bale pihu kang lumabas.
E mu pilan besis ing belakan ku na
Ing makyagnan dapot, yan mayayagwanta
Uli ning wali mung magdadalagita
A pilming abe mu agyang nu’ ka munta.
Mapilan penandit a pamanaya ku
Abatyawan da kang maglakad dili mu;
Inyasa’t sinulud keng kaisipan ku
King iti, ing peka-masanting a tyempu.
Sangkan kung e male ing ikang daratang
At e ku sasaryan ing keka makyagnan,
Nung inya pasimpli kung linwal king dalan
Kabud kalabas mu a mapilan takbang.
Sinigam kung bagya king ba’mung apansin
King aku ing kekang akatuki nandin;
Dapot waman aku, belikdan mu ku pin,
Mebilis la katuk ding kekang step-in.
Alus walung metro ing laut mu kaku
King pamituki ta’ng balus a lakad mu,
Nyang libutad dalan kabud namu atyu
Ing asna karagul a maputing asu.
Mipagulisak ka, king agya mang iti
E na ka linelen o keungan niti;
At king pangabigla mu rugu milyari
Ing e mu ukulan kekata malyari!
Milayi kang bigla’t kanaku kinaul
Kabang paparak kang aplit kanyang gabun;
“Tsu” na kang “tsu” kabang e ne man kakaung
Ing mesabing Asu lele ning butarul.
Meko ne ing Asu, atmu pa katigik
Ing kaul mu kaku ketang e mu malit;
Inya kapakde mu’t pangalino isip
Meninimutla ka keng kanakung panakit!
E mu ku alawe, dinuku kang bigla
Kabang aku naman pilit da kang yatna;
Inya king makanyan ta’ng kabilian mutya,
Ikit ding daralan ing milyaring mala.
Kapurit man ala kang maybug asabi,
Nune ing kitang mu anti ya kanini:
“Nung tutu” ngamu “ing kaku mu sinabi,
Ituki mo bale ding kekang pengari.”
Natural mu sintang mal dili king bie ku
Ing e ku payali, ngening bistung-bistu,
Meyakit, king ika ating lilihim mu
A dalise sinta kalupa ning kaku.
Balu ku, ing ika, kaku atin kang mwa
A pasari na ning penako kung uma,
Misan a menik kung e ke disan Ima
At ing chaperon mu atyu king kusina.
Inya king milyari nandin keka’t kaku
Alang munang diling pasalamatan ku,
King pangabistu ning kaku sisimpan mu,
A tune pakamal pasari ning Asu!
