Kabud ing GCQ ya ing mipairal,
meyakit ing sobra la ken king karakal,
ding balamu ngara mibulus keng kural
at misasaglulu king dalan memaglwal.
At keta ing maigpit a panabilin
Lubus ipatupad ing ‘social distancing,’
melabag at anting e mirinan pansin
pati ing dikil keng awsan ‘self quarantine’.
A nu’ ing peligrung malyaring miyawa
ing ninu ya man keng matinding ‘virus’ na
ning Covid- 19 a sakit a pandemya,
nung e na alisyan, yang ikamate na.
Pablasang iti e mengaring trangkasu
a malyaring potang minum kang panulu,
mapilan penandit, anti kang migpelu,
nya malyari na kang tipa keng bale mu.
Pero iting ‘virus’ kekatamu miras,
a ngara karin king Tsina yan menibat,
iti akakwa nang magpalipat-lipat
king aliwang tau keng saguling oras;
At nu’ ken ing balang metung a miyawa
kapamilatan na mu ning minatsing ya
(ing katau,) at ding karap asangap da
e malaut ing den miyawa-awa na la.
Inya makananung e la mikarakal
ding mipapanawa a parati keng lwal,
lalu ngening oren asna la karakal
ding ken balamu pin mitakas keng kural.
At agyang metung ya ing positibu ken
nung ating miyawa kilub na ning saken
o karing keng dalan asaganan da ren,
e la mag- ‘multiply’ ding miyawa karen?
At nu’ mapalyaring migit pa king ‘first wave’
mas mikarakal lang e palak o migit
ding bayu a magkang yawa niting sakit,
nung manatili ing panganib nang bitbit.
Ing kesyasan buntuk natural na kasi
karing kalupa ta’ng Pilipinu ngeni;
Maralas, ing bage asna king kasimpli,
E ra agyung daptan ding makasarili.
Mas kapad da pa ing manyayang lang oras
king alang masanting a ibie nang bukas
ning kabud mu karen mabilis lilipas
ing sabla’t ala lang malakwan a bakas;
(At mipabilang la karing minye dangal
at kapuryan para king Indungbalayan,
a’yanti mo pin di Dr. Jose Rizal,
ampo’y Bonifacio ning balen ta’ng tibwan).
At sana mapatlud na’t alang miyawa
karing ninu pa mang sinamal linwal na
keng dalan ampo pa ring linub king obra
ngening GCQ ne ing pepairal da.
Uli ning sakali’t iti maging mitsa
ning ngara ‘second wave,’ ing kamaulian na
migit pa king doble mekad ing dasan da
kabilangan ding ken mate keng pandemya?!
