Mapilan nang aldo miras na ing taning
A nu’ ing ECQ laban COVID-19
Yari na, pero nung ing kasyas buntuk ding
Aliwang tau e manuman, ya murin;
Nung nu’ngaku wari map a map mabawas
Ing bilang da ring ken miyawa at sukat
Kesa king uli na pin ning sobrang kasyas
Buntuk ding pasaway lalu lang miragdag.
A e imposibling malyari, nung e la
Masugpu dapat ken detang balu ra na
Ing bawal, balamu deti kusa ra pa
Yata ping papalto ren ing kesyasan da.
At kelan respeto king kaparang tau,
Antimurin karing manungkulan tamu
A sukat maramdam ampon mapamintu
Ing ipairal dang batas ning gubyernu.
Nung nu’ ita muring memalen at sabla
Ding miyawa imbes king yan mate kusa
Nung ala nang akapitan a’yaliwa,
Agpang king malino lulwal a balita.
Ing mesabing ‘virus’ a inaus deting
Pandemic, a ngara pin ken COVID-19,
Yan e karaniwan ‘virus’ a malyaring
King mapilan aldo malagwang asupil.
Iti e mengaring trangkasu a ken mung
Panulung lagnat o keng ‘paracetamol’
Malagwang maulu kilub patingapun
Kapamilatan nyan a keka ra paynum.
Mapilan mung oras anti yang migpeluu
At milako sakit ing metung a tau,
Pero king anti yang ‘virus’ asabi ku,
Malati ing tsansang akabiusan tamu.
Inya ikayung ken a mangasyas buntuk
A e mamintu keng masanting a usuk,
Ing e kayu lulwal angga’t iting ‘virus,’
Atyu pa, dakal a bie ken ing matampus.
Kabud ikayu ing mituran kaniti,
E mu ikayu ing mate, nu’ne pati
Kayabe yu bale miyawa kaniti
Keng kalilibut yung ala namang silbi.
At metung pang bage balu ra nang bawal
Ding mapad keng alak, illegal a sugal,
Intasang den e ra pamu patugutan,
Ban e ra takman den ing marakap misan.
Kaibat ning akinse na ning bulan a iti,
At nu’ suma total lunto ing posibli
E meging masanting ing resulta niti,
A ‘ECQ,’ wayni ing pihung malyari:
‘Back to Zero’ ngara king salitang Inglis
Ing eganagana, at nu’ mas masakit
Kesa ngeni, ing ken arapan ta’ng pilit
Pasari ning kesyasan yung balangidngid!
Nung nu’ ing buri ra ding antiting tau
Ya ing pagnasan dang pilit mapamintu,
At nung nu’ pati na utus ning gubyernu,
Lalabagan ding e ra balu ing ustu?!
Inya nung arapat namu naman pin ken
Ning pekamatas a Pamuntuk ning balen,
Ipakulong na la balang arakap den,
At kilub ning karsel da na la mu sesen.
Kesa king miyawa tamu keng asaglap
Dang ‘virus’ king kelan malasakit ganap
Ding aliwang makaynum la sanang alak,
E bali, king agyang dakal lang mangaskad?!
