BISPERAS NA bukas… ala ke pang babi
A ipagtawu mi king kalulung bili;
Dening kakung anac…maragul, malati
Aplit ing kutang da nung e ke pin sali.
E ku rugu balu ing ipakibat ku
Uling kulipak man talagang ala ku,
Nung e ku manutang king Intsik kung amu,
Kagili mang babi, nanung isali ku?
Isip-isipan ku ing mayap kung daptan
A nung makananu kung makapanutang;
Wa, makautang ku pero kaybat naman
Aku muring pihung magdusang mamusan.
Natural mung kaybat kung mekapag- ‘vale’
Karas ning sueldu ku… kumaltas neng pilmi.
Lalu ku mung pihung keng utang mapisti,
Kalabas ning pyesta, nung magtawu kami.
Pero, nung sakali e ku nabis kimut,
Ding anak ku ilang lunto makalunus;
Potang mag-paseo la retang mosikus,
Ikami wari ing e mitando alus?
Syempre pin naman nung makapagtawu ka
E ka manlap agyang magparatut ka pa;
Kase, e mu alisyan ing mika-bisita
Lalu pa’t balu rang magtawu kang sadya.
Aku, e ku naman malyaring asahan
Karing kayabe keng obra, alang datang;
Yan ing metung ku pang bage e alisyan,
Inya e malyaring e ku la pagsadyan.
Mepilit kung ngening menutang pinyali
King agyang mapilan mu ping kilung babi,
Saka ke dekap ing manaid pang sisi
Banting makaragdag ing mapilan gili.
Miras ing kapyestan… at memanyatang la
Pati e ku’asahan siput ming bisita;
Pero, king sabyan ku…manwala’t ali ka
Obat e megisan ing tawu ming sidya?
Makananu pala, anti keni’ing teknik
Ning kusinera ming maki-bantu isip,
Peka-pasobra na ing toyo at patis
King anggang ulam a singkapan ning buysit!
Inya, wayta rugu… pelalung kalasing
King ‘napag kung ulam bagya la tinagkil;
Deti, e ra naman ininum itang ‘gin’
Uling ing buri ra purus marimlang ‘beer’.
Malagua’t salita… milabas ing pyesta
A e mepitna man ulam king banggera;
Mupin.. ba’lang mulam kami, ing sisti na,
Ambulan ming danum ing egana-gana!
