MISAN tinuki ku karing kabaryu mi
A mamie ‘installment’ kasangkapan ngeni;
Aus da ‘canvassing,’ at lalaku ra iti
Keng mialiwang lugal a malaut keti.
At aku pin agyang e ku sadiang obra
Ing anti kaniting klasing pamagtinda,
Mepilit ku uling mitagun kanita
Kulipak man ala kung laman a bulsa.
Medyu malaut ing lugal ming pintalan
Bayu ra ke kildas king putut a dalan,
A nu’ kami ngana ning lider mi bilang
Manaluk panindang ibie ming baldugan.
Malaut-laut na ing kakung belebe
Keng kasasalangi karing bale-bale,
Manaluk baldugan… ing pakibat pane
“Sir, ala kami pung balung pamayad, eh!”
Angga king ikwa kung menikal magdala
Karing panaluk kung batya’t kaserola;
Intasang metung man ala kung abenta
Nung e ku dimalas inyang aldo ita?
(Ing kalakaran keng pamamye baldugan
Agpang keng balu ku, ing ‘down payment’ bilang
Ya ing para keka, inya pagpilitan
Den ing makabenta ba’lang manakitan.
Ke’ mekatagmu kang puru balasubas
A nganing kasebyan masulit mamayad,
Aliwa ikang magasgas a tsinelas
Keng singilan karas na ning takdang oras.
Nu’ne ing kolektor, inya ring magtinda
O ‘canvasser,’ deti e ra na problema,
Ing e la mamayad ding apakuanan da
At nu’ ing masambut ing kapitalista).
Pero, sumangid n’yan intasa ping aku,
Ala kung abenta rugo agyang nanu,
King panindang ibat nandin kakargan ku
Kilub na ning migit limang kilometru?
Wayni pa ing sisti king kaku merapat
Nung e ku talagang sobra kadimalas,
Obat kabud niamu mengalukguk sukat
Ing atyan ku, inagkat na kung magbawas.
Uli ning talagang maybug nang mibulus,
Migpampan na ku mu lele na ning bakud;
“Mama,” nganing keta dindam ku na kabud
“Ot agyang bagya mu e yu pu linaut?”
Pekibat ku… “Atse ibat ku Tulauc,
ini wari rugu e pa pu malaut?!”
At keta marapal na ku mung ginulut
(keng sobrang dine ku) …makaruku buntuk).
