KEN PAMUNG pamagat ning librung pang-anak
A pisaup-saup belangkas, sinulat
Ding mapilan karing matenakang anak
Ning balen, ing mal tang Sabi yang mitindag.
Meyakit ing atin pa muring gagambul
Ban iting salita miuman yang lumabung
At maniangang dakal antimo ing napun,
A nu’ e mu keti e matati sibul.
Nune pati karing karatig probinsya;
Umpisa Bataan, Tarlac, Nueva Ecija,
Dane Paralaya ning Bulacan, saka
Aliwa pang dake ning Nueva Viscaya.
Mupin, kekaban ning panaung miralan,
King paritak-ditak ikua nang mepangan
Ning salitang iti a kekatang menan
Karing kekatamung tune pipumpunan.
Angga na king iti, king pautik-utik
Misamutanan ya karing ken karatig
Tamung lalawigan, anti ken Calumpit
Uling atyu kapaldakan ning Apalit.
Ing ‘Tulya,’ karing ken a karelang yaus,
Kekatamu ila pin ding’Parus-parus’;
Ing ausan dang ‘Ibon’, kekatamu ‘Ayup’
Ding kekatang ‘Ebun,’ ing aus da ‘Itlog’.
At maging itamung tune Capampangan
Atin tamu namang pamialiwas misan,
Ing ‘Akasya,’ karas keng parting ‘Amianan’
Yaus da kareti ‘Patiklodyung’ naman.
Nanupata, agyang Capampangan tamu
Atin tamung pamialiwa Amanu,
Iti pasari ning ding minunang tau
King ‘Mauli’ at ning ‘Amianan’ siguru.
Pero ngening iting Salita ta’ng Mana,
Bibiayan deng anti kanitang minuna
Ding kaniting libru sinulat, mibata,
Paniwalan ku ing miuman kumabie ya.
Lalu’t iting siyudad na ning San Fernando,
Kapamilatan ning City Mayor tamu
A makibat king lagyung Edwin Santiago,
Suportadu ne iting mesabing libru.
Kambe nang Vice Mayor Jimmy T. Lazatin
Ampon aliwa pa pagnasan dang iting
Matagumpe pamilunsad ning mesabing
Libru king Vista Mall, mitukyan masanting.
At atin pang lunto katuki nang lumual
Ning mesabing libru, king kapamilatan
Ding king ‘Limang Kuentu..’ sinulat, mepagal
Ban atin lang basan ding ngeni magaral.
At nu’ antimurin, bukas o makadua
Mapalyaring atin ken magmunikala
Karing mangayap nang lider niting bansa
King pangalinang ning mialiwang salita.
At ban keta miuman masese, magambul
Ing salita da ring keng mialiwang rehiyon,
Bisaya, Ilonggo, Ilokano, Bicol
Ampon aliwa pa ban miuman lumabung
Ing ken katutubu rang Sabi e mate
Ding balang memalen ning mialiwang dake
Ning bansa, at banting manatiling mabie
Ing manang salita ring balang mabibie!
