(Kaugne ning milabas a pamagmasusi king milabas a pang-447 banuang panga-pundar ning mal tamung lalawigan, buri neng idake ning maluka yung talasuyu iting poesiang sinulat na a makarikil king gelingan da ring liping Capampangan king mialiwang adle ning arte at katutubung kultura).
ING KAPAMPANGAN ku,
apagmaragul ku, maging kaninu man
Uli ning Dai kung
Pantas at maginu, subuk king tepangan;
Jose Abad Santos,
Maximino Hizon at Tarik Soliman
Kabilang la karing
mapuring lipi ning mal ta’ng lalawigan,
A e ra pikabyang
ing mate uli na ning balen dang tibwan,
Libe ning itamu
e ta’ maging ipus king gamat ding daywan!
Ing ika at aku,
Kapampangan ka’ta king amanu’t diwâ
Dangalan ning metung
at metung kekata keti king masalâ;
Pablasang ing Dai
a pipumpunan ta’ng liping Maharlikâ,
E mu king tepangan
bukud meyakit ing kamalan da’t damlâ;
Ita’ng Kapampangan,
kasebyan – ngara ping gagkas ding aliwâ,
King arte’t kultura,
itang manimuna mabilug a bansâ!
Ding sikat a sastri,
alwagi, kanteru at tanyag a pintor
Kapampangan la ring
menasa kareti a meging mabalor;
Ing Betis a binang
kabalitan karing mayap a eskultor,
Maging king aliwang
suluk na ning yatu tinanggap lang honor;
At nung makananung
mirangal ing Guagua king uli nang Yuzon,
Lubao, karin neman
bait ing mapuring mal ta’ng Apung Dadong!
Sukat pagmaragul
ing Kapampangan ku at Kapampangan ka,
Uling ing liping yan
king kapilan pa man e mirinan mantsa;
At pablasang ita’ng
manimuna pati king pamaki-gyera,
Laban karing sukab
at king e maka-Dios a ideolohiya,
Kapampangan e la’
kabud na makapiak apapatuki ra,
Nun ‘e ita mu ring
kasalang ding bisang dalpak king Bandera!
