(Kaugne ning pamag-masusi king pambansang ‘Buwan ng Wika,’ a nung nu’ keting lalawigan ‘Aldo ning Amanung Sisuan’ ing katumbalas niti, a kekatang pagmasusian balang katlung Biernes ning bulan ning Agosto, at ngeni anti na waring mekalinguan ing dikil kaniti kilub ning e mu migit king pitu neng banuang e miririnan dake karing programa ning Kapitolyo, busten yung kapamilatan niting maluka nang panyulat ning kekong talisuyu, iting poesiang kabilang karing ing paksang diwa reti makapa-rikil king manang kultura, kapaligiran at manang sabi ing yampang mi para king mesabing okasyun at king malugud yung pamamasa).
NUKARIN ne ngeni baket sapa niamu
Iting mal kung ilug a sadiang malagu?
Ninu pa ing keni maliaring mandilu
Ngening ala nang bie ken agiang nanu mu?
Mingatba nang pampang atino’ mengatmu
King basurang dakal a keta menabu;
Ala na ing sadiang malabung a timbu
A meging sale ra ding denas at pugu.
Nukarin no’ ngeni ding magalo asan
A keni kanita miyalung alang tuknang?
Baket meging labuk ning laru’t kalawang
Ing malino danum a’yantimong kristal?
Iti, yang tanda ning malino piyakitan
King ala nang mabie bini rang mitagan?
At lalung ala nong’ bakas a melakuan
Ding keni magpaniud a matabang ulang?
Nu’no kaya miras king panaun a ini
Detang mangaragul a kabibi niti?
Nung dulungan te’ man kalibutnan iti,
Nanung maliari tang’ asalat kaniti?
Mekad basyung lata at kabalbal boti
Ampon aliwa pang bage makariri;
At agiang ninu pa ing tumalas ngeni,
E ne misukmama king dasan na keni.
Kayanakan, nanu ing agawa ta’ ken
Ban ding ding kailugan e la mipaburen?
Aku… ika’t ila, antimong memalen
Katungkulan tamu ing sagipan la ren;
Kimut ka… kimut ku…agkatan ya’ing balen
Ban ding bayung sibul akit da naman den
Ing deti e la pin sukat mipabusten,
Nune dapat ta’lang ingatan at sesen.
Nanung ulaga na king mal tang’ balayan
Ning ngara: Yan tanda na ning kaunlaran
King metung a bansang lalagu kabiayan,
Nung sumangid n’yan ala ta’nang kapanayan?
At ing sablang bage pati pangisnawan,
A keka at kaku binie ning Miglalang?
Malalasun at king ganap a kasiran
Miras pati ing bie a paka-ingatan?
O mekalibu pang magbalik ing sadiang
Ala ing panyulung a milalalung yan?
A ing maging bunga na ning kapalaluan,
Yang king bandang tauli ikamate ta’ ngan!)
