Misan pa keka sabian ku, king aku palsintan daka
Palsintan daka irug ku king dalise pamalsinta,
keka ya ing kakung pusu, balang pintig na keka ya,
uling ikang makibandi kening bye ku at inawa;
buri ku pang mate na ku bayu ing e ra ka sinta.
Nung aku e ra ka sinta, kaku alang kapaynawan
Uling ing palsintan daka,ya ing kakung kapayapan;
Ing bye kung alang hulaga mipnu yang kaligaligan
Nung pisawili ke irug ing keka ku kapalsintan
Uling ikang ligaya ku angga man king kamatayan.
Angga potang ing katawan iragsa na ne ning salun
At kuldas ne king kutkutan ing katawan kung matambun;
Ing pamalsintang dalise anting malinis a ambun
Manatili yang sagiwa king kekaba ning panawun
Pablasang ing sintang tune e kukupas, e lalawun.
Balwan kung e la kanaku ding dangat ding kekang mata
Balwan kung ding kekang timan e la kaku mal kung sinta;
Dapot palsintan daka rin, king dalise pamalsinta
bistaman e maging kaku ing lingap mu at alala
Bistaman e maging kaku ing tapat mung panalala.
Balwan kung ding kekang labi, ding uma ra, e la kaku
Balwan kung ding kekang takde, ding kawul da, e la kaku;
Dapot palsintan da ka rin king sintang sakdal king yubu
King sintang e biasang mate, king bistaman mete na ku
king sintang e ku alakwan king bistaman mamun naku.
Mamun ya keka irug ku ining diwa kung Poeta
Ining diwang sinagiwa dapot ngeni melanat na;
Nanung buri mung gawan ku karing lelang kung poesya
Karing kakung kawatasan a sikwil mu, kakung, Musa,
Nanung buri mung gawan ku kening pusu kung mete na?
Bustan mung….
Bustan mung kawulan da ka, kawulan daka sinta ku
Bustan mung kawulan daka king keka tawling kawul ku;
King keka tawli kung kawul sana yang panamdaman mu
Ing api ning kakung lugud a sikwil na ning lugud mu
Ing api ning kakung lugud a mipda king kandungan mu!
Bustan mu king uman daka, uman daka mal kung mutya
Bustan mu king uman daka king kanakung tawling uma
King keka tawling uma ku ya sang kekang abitasa
Mal ka kening kakung pusung keka linugud dakila
Mal ka kening kakung pusung malapit nang mamayapa.!
Bustan mu king lawan daka, Devota kung pangayamnan
Bustan mu king lawan daka, lawan dakang pakalawan;
King keka tawling lawe ku, bandyan ku ing kekang legwan
Bandyan ku ing e kanaku, gisanan ku ngan saklawan
Bandyan ku ing e kanaku, ban gisanan ku ngan lakwan!
Bustan mung timanan daka, o’ Malagu ding malagu
Bustan mung timanan da ka king tawling timan ning pusu;
King keka tawli kung timan asalamin mu ing tutu
keka ya ing tawli nang lwa ning kaladwa kung mebigu
keka ya ing tawli nang lwa ning kaladwa kung dumayu!
Bustan mung mamun ku keka, mamun ku keka, Diwata
Bustan mung mamun ku keka king tawling kawul at uma
King lawe ra ding mata ku asalamin mung mistula
King e mu na ku akit pa, uling lubus na kung mapda
King e mu na ku akit pa, uling subli ku king ala.
Palsintan daka irug ku king dalise pamalsinta,
keka ya ing kakung pusu, balang pintig na keka ya,
uling ikang makibandi kening bye ku at inawa;
buri ku pang mate na ku bayu ing e ra ka sinta.
Nung aku e ra ka sinta, kaku alang kapaynawan
Uling ing palsintan daka,ya ing kakung kapayapan;
Ing bye kung alang hulaga mipnu yang kaligaligan
Nung pisawili ke irug ing keka ku kapalsintan
Uling ikang ligaya ku angga man king kamatayan.
Angga potang ing katawan iragsa na ne ning salun
At kuldas ne king kutkutan ing katawan kung matambun;
Ing pamalsintang dalise anting malinis a ambun
Manatili yang sagiwa king kekaba ning panawun
Pablasang ing sintang tune e kukupas, e lalawun.
Balwan kung e la kanaku ding dangat ding kekang mata
Balwan kung ding kekang timan e la kaku mal kung sinta;
Dapot palsintan daka rin, king dalise pamalsinta
bistaman e maging kaku ing lingap mu at alala
Bistaman e maging kaku ing tapat mung panalala.
Balwan kung ding kekang labi, ding uma ra, e la kaku
Balwan kung ding kekang takde, ding kawul da, e la kaku;
Dapot palsintan da ka rin king sintang sakdal king yubu
King sintang e biasang mate, king bistaman mete na ku
king sintang e ku alakwan king bistaman mamun naku.
Mamun ya keka irug ku ining diwa kung Poeta
Ining diwang sinagiwa dapot ngeni melanat na;
Nanung buri mung gawan ku karing lelang kung poesya
Karing kakung kawatasan a sikwil mu, kakung, Musa,
Nanung buri mung gawan ku kening pusu kung mete na?
Bustan mung….
Bustan mung kawulan da ka, kawulan daka sinta ku
Bustan mung kawulan daka king keka tawling kawul ku;
King keka tawli kung kawul sana yang panamdaman mu
Ing api ning kakung lugud a sikwil na ning lugud mu
Ing api ning kakung lugud a mipda king kandungan mu!
Bustan mu king uman daka, uman daka mal kung mutya
Bustan mu king uman daka king kanakung tawling uma
King keka tawling uma ku ya sang kekang abitasa
Mal ka kening kakung pusung keka linugud dakila
Mal ka kening kakung pusung malapit nang mamayapa.!
Bustan mu king lawan daka, Devota kung pangayamnan
Bustan mu king lawan daka, lawan dakang pakalawan;
King keka tawling lawe ku, bandyan ku ing kekang legwan
Bandyan ku ing e kanaku, gisanan ku ngan saklawan
Bandyan ku ing e kanaku, ban gisanan ku ngan lakwan!
Bustan mung timanan daka, o’ Malagu ding malagu
Bustan mung timanan da ka king tawling timan ning pusu;
King keka tawli kung timan asalamin mu ing tutu
keka ya ing tawli nang lwa ning kaladwa kung mebigu
keka ya ing tawli nang lwa ning kaladwa kung dumayu!
Bustan mung mamun ku keka, mamun ku keka, Diwata
Bustan mung mamun ku keka king tawling kawul at uma
King lawe ra ding mata ku asalamin mung mistula
King e mu na ku akit pa, uling lubus na kung mapda
King e mu na ku akit pa, uling subli ku king ala.
