Tuloy na tuloy na ang pagbabalik-teleserye ni Judy Ann Santos dahil kahapon ay nagkaroon na ng promo shoot ang queen of teleserye at reyna rin ng ABS-CBN na sinaksihan ng ilang entertainment writers para sa prime time series na Huwag Ka Lang Mawawala (dating Against All Odds).
Ginanap ang promo shoot sa studio 10 ng ABS-CBN compound at dito pa lang ay binigyan na ng grandeng presentation si Juday ng network at paulit-ulit talagang inaanunsyo ang linyang “The queen is back!”
Sagot naman ni Juday, “the queen is backless!” dahil sa bonggang backless gown niyang suot.
So, ano nga ba ang pakiramdam sa pagbabalik ng reyna?
“Sa totoo, sobrang mas ’yung kaba, pero ’yung tuwa, nakaka-overwhelm and ’yung pressure… wala nang stress, eh, much more on ’yung nakaka-tense.
“Nakaka-tense talaga dahil siyempre iniisip mo kung ano ang sasabihin ng mga tao sa trabaho mo after a long time.
“It’s been two years, magti-three years (since gumawa siya ng soap), tapos medyo bagu-bago ’yung istorya, hindi ’yung typical na love story, it’s about women empowerment and at the same time, apaw na apaw ka sa emosyon dahil all of a sudden, ang daming atensyon, bigay-buhos ka talaga. And of course, very thankful,” pahayag ni Juday.
Ipakikita raw sa serye na ang babae ay hindi dapat sinasaktan, na dapat ay marunong lumaban at hindi raw porke’t asawa na, puwede nang apihin kaya tiyak daw na maraming makaka-relate na mga kababaihan.
Very timely nga ang serye dahil as we all know, ang hot issue ngayon sa showbiz ay ang sinapit ni Ai-Ai de las Alas sa piling ng asawa kaya nahingan dito ng reaksyon si Juday.
“Well, siyempre sad, kaibigan natin si Ai-Ai. I don’t know Jed personally and you know, I have nothing else to say to him. It’s just that it’s really sad na parang ang isang love story na pinangarap ng isang tao, all of a sudden, biglang nawala.
“And sana talaga, walang ganu’n, ’di ba, sana ang lalaki, hindi umaabot sa puntong kailangang pagbuhatan ng kamay ang babae — asawa, anak, nanay o kung sino pa man. Kasi hindi dapat nagkakasakitan ang mga taong nagmamahalan.”
Ang serye ay dedicated hindi lang daw kay Ai-Ai kundi sa lahat ng kababaihan na nakakaranas ng pang-aabuso. Pero hindi naman daw ito sinadyang gawin for Ai-Ai only.
“Nagkataon lang talaga. Pero hindi naman ito talaga patungkol sa sitwasyon ni Ms. Ai-Ai. Mahal namin siya, and we’re all here for her, nagkataon lang na ito ang naging tema ng teleserye namin.”
Pagdating naman sa sarili niyang married life at sa pagsasama nila ni Ryan Agoncillo, aniya, nagkakaroon din sila ng pag-aaway ng asawa.
“May mga moment din naman na may mga issue kami ni Rye (Ryan), hindi naman ito bed of roses, may mga pinagdaraanan din naman kami, hindi lang halata.
“Pero ’yung issue na ’yun, sa amin lang ’yun, sa bahay lang ’yun, hindi na namin hinahayang lumabas pa. Kung anuman ang pinagdaraanan namin, it makes us stronger and it makes us better persons. So, wala ’yun, dedma lang.”
May tsika ring lumalabas na may secret annulment na raw na nagaganap sa kanila ni Ryan na mahirap talagang paniwalaan.
True enough, natawa lang si Juday nang klaruhin ito sa kanya.
“Ano ba ’yan? Eh, ’di ba, ang mahal-mahal magpa-annul ngayon, ba’t magpapa-annul pa? Saka meron bang secret annulment?” natatawang sabi ni Juday.
Noon pa ay paulit-ulit na lang ang issue ng hiwalayan nina Juday at Ryan kaya tinatawanan na lang daw nila ito.
“Nakakaawa na sila kung sinuman ang gumagawa ng istorya na ’yan. Sa totoo, nakakaawa. Kasi, parang… bored ba kayo? Kasi, paulit-ulit na lang. Kailangan bang gumawa kami ng event na kakaibang pag-uusapan para malayo naman tayo sa hiwalayan na tsismis?
“Pero nakakatawa na lang din dahil meron ba kaming ipinakitang eksena ni Ryan na puwedeng mag-conclude na naghiwalay kami or nag-undergo kami ng counselling?
“Pero sa isang banda, gusto na lang naming isipin na baka concerned lang sila,” say ni Juday.
Gusto na lang daw niyang mag-isip ng positibo lalo pa nga’t napakasuwerte raw niya this year.
“Ang daming trabahong pumapasok, ang daming kaibigang nandiyan, ABS-CBN is there, the whole management is there, talagang inaalagaan nila ako. Kung magpapaka-nega pa ako, para namang napaka-bitter ko sa nangyayari sa akin.
“So, tinatawanan ko na lang dahil masyado akong masaya ngayon, masyado akong proud, masyado akong overwhelmed with happiness right now. So, ayokong masira ang konsentrasyon ko, ayokong masira ang focus ko. I’m just really very happy,” she said.
Ngayong June na iere ang Huwag Ka Lang Mawawala at kasama rin dito sina KC Concepcion, Sam Milby, John Estrada, Mylene Dizon at marami pang iba.
