1.
Ding memalen Macabebe antimurin king Masantul
ing daranasan dang albug makaba na ring panaun
mekad mipasawa na la ikwa rang misasanmetung
migprotesta la ring tau king plaza mitipun-tipun
ninu pin namang tumula nung kagising mung maranun
at magsiyasat kang pamangan tumalas naka king danum
2.
E naman rugu magsilbing e la kararagling kimut
pauli ring magaral a maranun mu naman lulub
antimurin ding magobra king medyu malaut-laut
burian da man ampon ali dumulung la rin king albug
ding menasa akit mu la a mamitbit pang sapatus
karas king malanging dalan karin do pamu isulud
3.
Ding memalen karing adwang balayan a mesambitla
king kekaban ning panaun ikwa ra ring mipasawa
agiang kurusan la salu e malyaring e la mimwa
uli da reting flood control a laman da ring balita
atin naman palang pondu para king pamipagawa
para karetang proyekto a king danum maging sagka
4.
Nung ding pondu king flood control magagamit la king ustu
mekad midinan sulusyun albug king balang distritu
arapat da naman ita nung mayap lang magserbisyu
at nung isipan da mu ing kapakanan da ring tau
dapot ustung sakim la ring manibala kekatamu
magisan la mu ring pera alang mayaring proyektu
5.
Agiang kabukas la sanang mamag-TIKTOK at teterak
king proyektu ning flood control atin la sang asasamas
anti king metung a mayor na nitang pamosung syudad
king bista’t man mag tiktok ya atin neman ararapat
dapot itang kongresista king sasakupan nang labuad
ala yang kamale-male dakal no ring mikakamas
6.
Manibat king sinabi nang ban maampat ining albug
dapat kanu ing climate change pamu kanu ing maayus
detang anggang mekabasa ketang piskil da king facebook
minupul mung mangatsurang kumentu ampon batikus
inia pin atin flood control a bilyun-bilyun a gastus
yang panapat king climate change ban kanita e na lumbug
7.
Ing balen na ning Masantul ampo pa ing Macabebe
mistula nong dayat malat ding sadiang berding marangle
bubungan na la ring makalto karetang aliwang bale
lakuas na king San Francisco at maging king San Vicente
ing San Gabriel antimurin pati na ing Caduang tete
liklak na no ngan ning danum neng ing ilug linapo ne
8.
Makalunus la ring tau a sakup na ning 4th District
lakuas na king Macabebe, king Masantol at Apalit
king Candaba, king San Simon, king Minalin at San Luis
ding aliwang residenti sapak nong lipunga bitis
nung ding pondu king flood control masalese lang megamit
mekad ala nang albug at ala nang mamagkasakit
