Misan minukyat ku king eran a matas
ban agtalan ku la retang mansanitas
king tauling balitang bayu ku pa miras
o’bat karin ku pa ikwang mitaluras
Bala-balaus kung mebaldug king lalam
pablasang e ku na ikwang mekatalan
neng migkulang bagya ining kaingatan
digsu naku rugu mengapakli tagyang
Uli ning dimdam kung e bibirung sakit
king panganabu ku a mumuna buldit
gewa kung paralan ban e na maulit
ing kaku milyari; ginawa kung sungkit
dapot ding matiro; eku la ayabut
uli ning sungkit ku a mibabayutuk
ania pati retang e pa man malulut
alulugus kula king karelang tampuk
Ania pasibayu malale kung menik
king disan kung eran a karin da kebit
balang itakbang ko ding kanakung bitis
makaantabe ing talan kung matigik
Ikwa kong anapnap ding bungang malulut
a ketang sungkit ku eku man ayabut
at kanita ku pa lubusang atalus
ala kung asapat nung e ku melaus
Ustung mengarap ka king maluka mung bie
ing determinasyun kailangan yang tune
nung ketang primeru eka menagumpe
e dapat sumuku; king banal mung pake…
