ing agus ning danum, e agad misadsad
king pamaglakbe na, ‘ting makasalabat
kaylangang ilisya, nunti man kabayat
mabilis nang dusug, nung iti marapat.
aslag man ning aldo, nung e makasilip
makapal lang biga, tatakap mung pilit
kapag medalumdum, uran ing kapalit
manenayang bukas, ala nang papatik.
angin mang papaspas, buring mapayapa
ali maging sangkan, ating miraragsa
dapot maliliari, kalub ning tadjana
e tamu apigil, ala tang agawa.
pusu tang titibuk, sisinta yang lubus
ipasyag ing lugud, king dalagang irug
managumpe’t mabigu, ali ka matakut
kekang pilubluban, e mu sasalikut.
tanamang sisirut, e bisang paygutut
nasa ng dagul ya, tumas pang malaus
nanu mang sumbagal, agyu sang asambut
bagyu man o ayun, dumalan mu kabud.
ing asang kakawe, ali ‘gad marakap
dakal lang semilya, kaya la manibat
malayang salangsang, king alung salapsap
‘la sanang manasang ing gamit e lambat.
susulapong ayup, matas king alapap
e sa mapinsala, deng adua ng pakpak
miadya king angin, king balang pagaspas
pati king tatalang, tirador king gamat.
nanu mang melalang, tau ma’t animal
mabibie king danum, o gabung petagan
e maliaring ala, delanang sumbagal
ing egana-gana, agyu sang lagpasan.
bie na ning tau, marakal pagsubuk
magpakatatag ka, sikanan ya ing lub
atyu mu’t kasiping, Guinung manunubus
e naka pabusten, kaya ka mamaus.
