O, ba’t sinukul yu ku, king bintang e ku gewa?
Komo ba’t e ku agyu, abogadong mal upa
Sabian ku nang katutuan, menaig ing ‘ting sala
Saguling meatulan, dakal banuang parusa
Metanggal ku kalayan, migmantsa pangatao
King siksikang kulungan, boses ku manga-payo
Ala kung kamag-anak, kalugurang dadalo
Serilinan ing lungkut, dangal pati penako
Kayanakan mesayang, na dapat kung danasan
Malaya nanung buri, mika ‘ting luluguran
Pamilya sang abuu, tajimik mangabiayan
Makananung maliari, takman kung kaparusan
Itang oras pangakulung, balamu e ku linto
Libas egana gana, ning huwes a balatkayo
Kapinamung kapanualan, kaku e milalako
Iyang maging sikanan, king bie ku aldo aldo
Karas ning dalumdum, panga-gising masala
Lalawe kareng rehas, king pader nunting dimla
King marinat a ulas, yang mabuluk a kama
Ilang pane kayabe, pati presong kalupa
Keng panga-sukul maluat, kagiwang e melukas
Salpantaya king Diyos, kaku magpakatatag
Nung mewalan mang boses, king hustisyang e patas
Kakung pluma at papel, keni ku apapasyag
Ing isip ku at diwa, ing mitagan pa kaku
Bala nang asusulat, tutu ku palang tau
Mapalyaring e male, ‘tin yang sangkan ing Guinu
Palad kung meging maskup, eku ikwang sinuku
Limang dekadang migit, pepalwal da kulungan
Kakaba ning panaun, linto ing katutuan
Saup ning abogado, ing kaso ku mekalkal
Ba’t ya kareng samajan, makanian kapagnasan
Melayang akung dili, sulud ing dating malan
Obra kung pemaniulat, e na agyung bilangan
Nung sana pin magsilbi, maging librung babasan
Ban ing pangasukul ku, atin yang pakinabang
Nung ating makabasa, mimulat deng mata ra
Mesukul mang malambat, kalayan e mewala
Binie kakung kagiwan, matibe salpantaya
Ilang bibie pag-asa, keng denasan kung sigwa
Nung atin pang balikan, marakal nang migbayu
Waring bayung penganak, keti babo ning yatu
Mapalad ku pa murin, ing melili ali ku
King balang dadalanan, e paysambut king tuksu
Alus de ng makasukul, ala mang kasalanan
Makanian ya kabuluk, hustisyang pairalan
Milang kang pilang banua, bayu ing kahatulan
Akwa na pang gumupu, ing ‘lang salang pepalwal.
